परभणी : शहरात सध्या काही सैराट युवकांकडून बुलेट मोटारसायकलच्या सायलेंसरमध्ये बदल करण्यात येत आहेत. त्यामुळे बुलेटच्या सायलेंसरमधून मोठ्या आवाजात फटाके फोडल्याप्रमाणे आवाज येत आहेत. या आवाजामुळे नागरिक दचकत असून त्यांना या आवाजाच्या धडकीने भीती निर्माण झाली आहे. विशेषत: रात्री उशिरापर्यंत हा प्रकार शहरातील मुख्य रस्त्यासह गल्ली, बोळात सुरू असल्याने ज्येष्ठ नागरिक, महिला, लहान मुलांना मोठा त्रास सहन करावा लागत आहे. याकडे पोलिस विभागाने गांभीर्याने लक्ष देऊन संबंधीत बुलेट चालकांवर कठोर कारवाई करावी अशी मागणी होत आहे.
शहरातील मुख्य रस्ते, चौक तसेच गर्दीच्या ठिकाणी काही युवक मुद्दाम सायलेंसरमध्ये बदल करून कानठळ्या बसवणा-या फटाक्याचे आवाज काढत आहेत. अचानक मोठ्याने होणा-या या आवाजामुळे नागरिक दचकत असून त्यांना धडकी भरत आहे. यामुळे रस्त्यावरून जाणा-या इतर दुचाकी चालकही सैरभैर होऊन अपघाताच्या घटना घडत आहेत. या पार्श्वभुमीवर शहर वाहतूक शाखा पोलिसांनी अशा सैराट बुलेट चालकांवर दंडात्मक कारवाई करावी अशी मागणी नागरिकांमधून होत आहे.
शहरातील वाहतूक शाखा पोलिसांनी काही महिन्यांपूर्वी बुलेटच्या सायलेंसरमध्ये बदल करणा-या बुलेट चालकांना पकडले होते. या बुलेट चालकांच्या बुलेटचे सायलेंसर काढून ते नष्ट करण्याची कारवाई करण्यात आली होती. परंतू शहरात सद्यस्थितीत काही बुलेट चालक सैराटपणे रस्त्यावरून धावत बुलेटच्या सायलेंसरमधून फटाका आवाज काढत असल्याचे दृष्य पुन्हा पहावयास मिळत आहे. वाहतूक शाखा पोलिसांनी या विरोधात विशेष मोहीम राबवून वाहतूक नियमभंग करणा-यांवर दंडात्मक कारवाई करावी, अशी मागणी होत आहे
