गंगाखेड: नांदेड येथे ‘नीट’ (NEET) परीक्षेची तयारी करणाऱ्या एका १८ वर्षीय विद्यार्थ्याने परीक्षेत उत्तीर्ण होण्याच्या चिंतेतून विषारी औषध प्राशन करून आपली जीवनयात्रा संपवल्याची हृदयद्रावक घटना समोर आली आहे. प्रथमेश मोहन राठोड (वय १८, रा. गोदावरी तांडा) असे मयत विद्यार्थ्याचे नाव आहे. या घटनेमुळे संपूर्ण परिसरात हळहळ व्यक्त केली जात आहे.
मिळालेल्या माहितीनुसार, प्रथमेश नांदेड येथे राहून नीट परीक्षेची तयारी करत होता. चार दिवसांपूर्वीच तो सुटीसाठी आपल्या मूळ गावी, गोदावरी तांडा येथे आला होता. २७ मे रोजी रात्री घरातील सर्वजण जेवण करून झोपले असता, २८ मे रोजी पहाटे १ वाजण्याच्या सुमारास प्रथमेशला उलट्या होत असल्याचे त्याच्या आईच्या निदर्शनास आले.
उपचारादरम्यान मृत्यू
मुलाची प्रकृती खालावल्याचे पाहून कुटुंबीयांनी त्याला तातडीने गंगाखेड उपजिल्हा रुग्णालयात दाखल केले. मात्र, डॉक्टरांनी तपासणी केल्यानंतर प्रथमेशला मृत घोषित केले.
परीक्षेच्या तणावामुळे उचलले टोकाचे पाऊल
मृत्यूच्या काही काळ आधी आईने विचारपूस केली असता, “मी नीट परीक्षा उत्तीर्ण होईन की नाही,” या चिंतेमुळे आपण हे टोकाचे पाऊल उचलल्याचे प्रथमेशने सांगितले होते. या घटनेबाबत विनायक राठोड यांनी गंगाखेड पोलीस ठाण्यात माहिती दिली असून, त्यांच्या तक्रारीवरून पोलिसांनी आकस्मिक मृत्यूची नोंद केली आहे. पुढील तपास पोलीस करत आहेत.
