संभाजीनगर : प्रतिनिधी
खासदार संदीपान भुमरे यांच्या ड्रायव्हरला आयकर विभागाने १५० कोटींची जमीन भेट मिळाल्याप्रकरणी नोटीस पाठवली आहे. ही जमीन हैदराबादमधील सालारजंग कुटुंबाच्या वारसांनी त्याला हिबानामा (बक्षिसी) स्वरूपात दिल्याचे सांगितले जात आहे. प्रकरणाची चौकशी आर्थिक गुन्हे शाखेकडून केली जात आहे. दरम्यान, चौकशीत अद्याप ठोस पुरावा मिळालेला नाही, अशी माहिती पोलिस सूत्रांकडून मिळाली आहे.
बोगस नवाबाच्या मदतीने भूमरे यांच्या ड्रायव्हरच्या नावे सुमारे साडेआठ एकर जमीन हिबानामा करून देण्यात आली. हा व्यवहार केवळ ५०० रुपयांच्या बॉण्डवर करण्यात आला. इतकेच नव्हे, तर सिटी सर्व्हे कार्यालयात पीआर कार्ड मिळवण्यासाठी अधिका-यांनाही हाताशी धरले गेले. ही संपूर्ण प्रक्रिया रातोरात उरकण्यात आली आणि संबंधित जमिनीची कोणतीही रजिस्ट्री न करता थेट मालकी हस्तांतरित करण्यात आली, असा आरोप इम्तियाज जलील यांनी केला. केवळ चार सेकंदात ६ एकर जागेचा व्यवहार झाला, असा तपशील इम्तियाज जलील यांनी कागदपत्रांद्वारे दिला.
ड्रायव्हर जावेद काय म्हणाले : आर्थिक गुन्हे शाखेकडून तपास सुरू असतानाच, आता आयकर विभागाने जावेद शेख यांनी नोटीस पाठवली आहे. भूमरे यांचा ड्रायव्हर जावेद शेख मात्र आपल्या जबाबावर ठाम आहे. यावेळी बोलताना शेख म्हणाले की, यात व्यवहार काहीही झालेले नाही. मला काही पैसे मिळाले नाही, मी काही दिले नाही, मी काही दोषी नाही. माझे दुर्दैव आहे मी भुमरे साहेबांचा ड्राइव्हर असल्याने यात माझे नाव घेतले जात आहे. पण यात माझा काही संबंध नाही.
नेमके काय आहे प्रकरण?
दूध डेअरी सिग्नल ते काल्डा कॉर्नर मार्गावरील अंदाजे १५० कोटींचा पडीक भूखंड खासदार संदिपान भुमरे यांचा चालक जावेद शेख यांच्या नावावर करण्यात आला आहे. विशेष म्हणजे हैदराबादचे मीर महेमूद अली खान यांनी ही जमीन ‘भेट’ म्हणून दिल्याचा दावा करण्यात आला आहे. मात्र, एवढ्या मोठ्या किमतीचा भूखंड एका चालकाच्या नावावर दिला गेल्याने हा व्यवहार संशयास्पद ठरत असून परभणीतील वकिलाने आर्थिक गुन्हे शाखेत तक्रार दाखल केली आहे. तक्रारीनुसार, जमिनीसाठी सुमारे ९० लाख ते १ कोटी रुपये रोख किंवा आरटीजीएसने दिल्याचा दावा आहे. यासाठी करारनामा व हिबानामा तयार करण्यात आला. मात्र, भुमरे यांच्या हस्तक्षेपामुळे खोट्या दस्तऐवजांद्वारे ही मालमत्ता जावेद शेख यांच्या नावावर करण्यात आल्याचा आरोप आहे.
