लखनौ : वृत्तसंस्था
आयपीएलमध्ये आज लखनौ सुपर जायंटस आणि राजस्थान रॉयल्स आमने सामने आले होते. राजस्थान रॉयल्सने लखनौ सुपर जायंटसला पराभूत केले. लखनौने टॉस जिंकून प्रथम गोलंदाजी करण्याचा निर्णय घेतला. पण त्या निर्णयाचा त्यांना फायदा घेता आला नाही.
राजस्थान रॉयल्सने प्रथम फलंदाजी करताना २० ओव्हरमध्ये ६ बाद १५९ धावा केल्या. या धावसंख्येचा पाठलाग करताना लखनौच्या फलंदाजांना अपयश आले. एकमेव मिशेल मार्शने ५५ धावा केल्या तर राजस्थानकडून सर्वाधिक ४३ धावा रवींद्र जडेजाने केल्या. आज जडेजाने गोलंदाजीतही दमदार कामगिरी केली. त्यामुळे लखनौचा संघ ११९ धावांवर बाद झाला. राजस्थान रॉयल्सने लखनौवर ४० धावांनी विजय मिळवला. या विजयासह राजस्थानने यंदाच्या हंगामातील पाचवा विजय मिळवत १० गुणांसह गुणतालिकेत दुस-या स्थानी झेप घेतली.
जडेजाची दमदार कामगिरी
राजस्थानच्या डावाची सुरुवात वैभव सूर्यवंशी आणि यशस्वी जयस्वाल या दोघांनी मिळून ३२ धावांची सलामीची भागीदारी केली. मोहम्मद शमीने यशस्वी जयस्वाल याला २२ धावांवर बाद केले तर ध्रुव जुरेल शुन्यावर बाद झाला. वैभव सूर्यवंशी ८ धावा करुन बाद झाला. यानंतर रियान परागने २०, हेटमायरने २२ धावा केल्या तर रवींद्र जडेजा ४३ धावा करुन नाबाद राहिला. डी. फेरारियाने २० आणि दुबेने १९ धावा केल्या. यामुळे राजस्थानचा संघ २० ओव्हरमध्ये ६ बाद १५९ धावा करु शकला. या धावसंख्येचा पाठलाग करण्याचे आव्हान लखनौसमोर होते. परंतु लखनौचा संघ ढेपाळला आणि त्यांना ११९ धावांपर्यंतच मजल मारता आली. त्यामुळे लखनौचा दारुण पराभव झाला.
