मुंबई : प्रतिनिधी
दिल्लीतील जंतरमंतर येथे विद्यार्थ्यांच्या आंदोलनाला पाठिंबा दिल्यानंतर ज्येष्ठ अभिनेत्री शबाना आझमी यांना स्वाईन फ्लू झाल्याचे निदान झाले आहे. प्रकृती बिघडल्यामुळे त्यांनी आगामी सर्व सार्वजनिक कार्यक्रमांपासून दूर राहण्याचा निर्णय घेतला असून डॉक्टरांनी त्यांना पाच दिवस पूर्ण विश्रांती आणि विलगीकरणाचा सल्ला दिला आहे.
शबाना आझमी यांनी त्यांच्या इन्स्टाग्राम अकाऊंटवर एक पोस्ट शेअर करत याबद्दलची माहिती दिली आहे. आंदोलनातील एक फोटो शेअर करताना त्यांनी लिहिले की, त्या २५ जुलैच्या मुंबईतील आंदोलनात सहभागी होणार होत्या, मात्र स्वाईन फ्लूची लागण झाल्यामुळे त्यांना पुढील पाच दिवस विलगीकरणात राहावे लागेल.
तरुण पिढीच्या धैर्यामुळे व दृढनिश्चयामुळे आपल्याला सतत प्रेरणा मिळत असल्याचे त्यांनी नमूद केले असून, या संदेशासोबत त्यांनी त्यांचे वडील कैफी आझमी यांची ‘नौजवान’ ही कविताही शेअर केली आहे.
