पालघर : प्रतिनिधी
पालघरमध्ये व्यावसायिकाने आत्महत्या केली. डहाणू तालुक्यातील चिंचणी येथे ही घटना घडली. डहाणू तालुक्यात वाढत चाललेल्या अवैध खासगी सावकारीने या व्यावसायिकाचा बळी घेतला. अमानुष व्याजदर, सततचा मानसिक छळ, शिवीगाळ आणि धमक्यांना कंटाळून एका डायमेकिंग व्यावसायिकाने आत्महत्या केली. आत्महत्येपूर्वी व्यावसायिकाने सुसाईड नोट लिहिली. यामध्ये त्यांनी ५ खासगी सावकारांची नावं लिहिली. या प्रकरणी वानगाव पोलिस ठाण्यात सावकारांविरोधात गुन्हा दाखल करण्यात आला आहे.
मिळालेल्या माहितीनुसार, डहाणू तालुक्यातील चिंचणी येथे राहणा-या किशोर दवणे या व्यावसायिकाने आत्महत्या केली. किशोर डायमेकिंगचा व्यवसाय करून आपल्या कुटुंबाचा उदरनिर्वाह करत होते. व्यवसायवाढीसाठी त्यांनी नवीन वायरकट मशिन खरेदी केली होती. तसेच वर्कशॉपचे नूतनीकरणही केले होते. यासाठी वेगवेगळ्या सावकारांकडून कर्ज घेतले होते. पण अलीकडील काळात व्यवसायात आलेल्या मंदीमुळे कर्जाचे हप्ते वेळेवर भरणे शक्य होत नव्हते. त्यामुळे सावकाराकडून त्यांचा जाच सुरू होता.
किशोर दवणे यांनी सावकारांकडून व्याजाने पैसे घेतले होते. सुरुवातीला मदतीचा हात वाटणारी ही रक्कम पुढे जाचक ठरली. घेतलेल्या पैशांपेक्षा अधिक रक्कम परत देऊनही व्याज थकल्याचे सांगत संबंधित सावकारांकडून सातत्याने फोनवरून त्रास दिला जात होता. मानसिक छळ, शिवीगाळ आणि धमक्या दिल्या जात होत्या. रस्त्यात अडवून चारचौघांत अपमानित केले जात होते. त्यामुळे किशोर दवणेंचा मानसिक ताण वाढला होता. याच त्रासाला कंटाळून त्यांनी २ ऑगस्टला राहत्या घरी आत्महत्या केली. बेडरूममध्ये त्यांनी गळफास घेत आयुष्य संपवले होते. या घटनेप्रकरणी पोलिसांनी आकस्मिक मृत्यूची नोंद केली होती.
