पोहण्यासाठी गेले होते तरुण, दोघांची ओळख पटली
छ. संभाजीनगर : प्रतिनिधी
उन्हाळ््यामुळे सध्या अंगाची लाही लाही होत असून उन्हाळी सुटीत पोहण्यासाठी विहीर, तलाव किंवा नदी पात्रात तरुणाईसह वडीलधारी मंडळीही जात असतात. परंतु धक्कादायक म्हणजे छ. संभाजीनगर शहरालगत असलेल्या हर्सूल तलावात पोहण्यासाठी गेलेल्या ४ तरुणांचा बुडून दुर्दैवी मृत्यू झाल्याची हृदयद्रावक घटना घडली. या घटनेने परिसरात शोककळा पसरली आहे. मृतांपैकी दोघांची ओळख पटली असून इतर दोघांची ओळख पटविण्याचे काम सुरू होते.
हर्सुल तलावात तरुण मुले बुडाल्याची आणि सुरुवातीला ३ तरुण तलावात बुडाल्याची माहिती अग्निशामक दलाला मिळाली होती. त्यानुसार अग्निशमन पथक तातडीने घटनास्थळी दाखल झाले. पथकाच्या मदतीने बचावकार्य करत तिघांचे मृतदेह तुरुंगातून बाहेर काढण्यात आले. दरम्यान, तलावाच्या दुस-या बाजूला आणखी एक तरुण बुडाल्याची माहिती मिळाल्यानंतर अग्निशामक दलाने तेथेही शोधमोहीम राबवली. त्यावेळी चौथ्या तरुणाचा मृतदेह पाण्यात आढळून आला.
रविवारची सुटी असल्याने हे सर्व तरुण तलावात पोहण्यासाठी गेले होते, अशी प्राथमिक माहिती समोर येत आहे. मात्र, हा रविवार त्यांच्या आयुष्यात शेवटचा ठरल्याची दु:खद घटना घडली असून परिसरात हळहळ व्यक्त होत आहे. मृतांपैकी अफान खान आणि आदिल शेख अशी दोघांची नावे समोर आली असून उर्वरित दोघांची ओळख पटविण्याचे काम सुरू आहे. तलावात बुडालेल्या चौघांचेही मृतदेह उत्तरीय तपासणीसाठी घाटी रुग्णालयात पाठवण्यात आले असून पोलिसांकडून पुढील तपास सुरू आहे.
