बार्शी (संतोष जाधवर): बार्शीत ऑनलाइन व्यवहारातील एका छोट्याशा चुकीमुळे तब्बल ४५ लाख रुपयांचे आर्थिक नुकसान झाल्याची धक्कादायक घटना समोर आली आहे. ५ लाख रुपये पाठवायचे असताना चुकून ५० लाख रुपये ट्रान्सफर झाल्यानंतर अतिरिक्त रक्कम परत करण्यास टाळाटाळ करणाऱ्या व्यक्तीविरुद्ध बार्शी शहर पोलीस ठाण्यात फसवणुकीचा गुन्हा दाखल करण्यात आला आहे. या घटनेमुळे ऑनलाइन व्यवहार करताना आवश्यक ती काळजी घेण्याचे महत्त्व पुन्हा एकदा अधोरेखित झाले आहे.
पोलीसांनी दिलेल्या माहितीनुसार, अमित राजेंद्र कटारिया (वय ४४) हे बार्शीतील पटेल चौक परिसरात कापड व्यवसाय करतात. ७ जून २०२६ रोजी त्यांचे मित्र सुशांत बाळकृष्ण शहाणे यांनी उसनवारीसाठी ५ लाख रुपयांची मागणी केली होती. त्या वेळी कटारिया यांच्याकडे रोख रक्कम उपलब्ध नसल्याने त्यांनी ऑनलाइन व्यवहाराद्वारे पैसे पाठवण्याचे मान्य केले. यासाठी शहाणे यांनी गोव्यातील त्यांच्या ग्राहक रामभाऊ सुनील मोरे यांच्या बँक खात्याची माहिती दिली.
सायंकाळच्या सुमारास नेट बँकिंगद्वारे व्यवहार करताना कटारिया यांच्याकडून मोठी चूक झाली. ५ लाख रुपये पाठवण्याऐवजी त्यांनी चुकून थेट ५० लाख रुपये रामभाऊ मोरे यांच्या खात्यावर वर्ग केले. दुसऱ्या दिवशी बँकेचा संदेश तपासल्यानंतर त्यांना ही गंभीर चूक लक्षात आली. त्यानंतर त्यांनी तातडीने संबंधित व्यक्तीशी संपर्क साधून अतिरिक्त गेलेले ४५ लाख रुपये परत करण्याची मागणी केली.
सुरुवातीला रामभाऊ मोरे यांनी त्यांच्या खात्यात ५० लाख रुपये जमा झाल्याचे मान्य केले आणि जादा रक्कम परत करण्याचे आश्वासनही दिले. मात्र, त्यानंतर परिस्थिती बदलली. कटारिया यांनी वारंवार संपर्क साधून पैसे परत मागितले असता, “आज देतो”, “उद्या देतो” अशा कारणांवर वेळकाढूपणा सुरू झाला. अनेक दिवस उलटूनही रक्कम परत न मिळाल्याने कटारिया यांनी अखेर बार्शी शहर पोलीस ठाण्यात धाव घेत तक्रार दाखल केली.
तक्रारीच्या आधारे पोलिसांनी रामभाऊ सुनील मोरे (मूळ रा. साकत, ता. बार्शी; सध्या रा. खापाबंदर, पौंडा, गोवा) यांच्याविरुद्ध फसवणुकीचा गुन्हा नोंदवला आहे. जादा रक्कम खात्यात जमा झाल्याचे माहीत असूनही ती परत न करता टाळाटाळ केल्याचा आरोप त्यांच्यावर करण्यात आला आहे.
या प्रकरणामुळे डिजिटल व्यवहारांमध्ये एका अंकाच्या चुकीची किंमत किती मोठी असू शकते, याची जाणीव झाली आहे. बँकिंग तज्ज्ञांच्या मते, मोठ्या रकमेचे व्यवहार करताना लाभार्थ्याचे नाव, खाते क्रमांक आणि रक्कम यांची दोनदा खात्री करणे अत्यावश्यक आहे. दरम्यान, या प्रकरणाचा पुढील तपास बार्शी शहर पोलीस करीत असून आरोपीकडून अतिरिक्त रक्कम परत मिळवण्यासाठी कायदेशीर प्रक्रिया सुरू करण्यात आली आहे.
