अहमदनगर : ‘सबका मालिक एक’ आणि श्रद्धा सबुरीचा संदेश देणा-या साईबाबांच्या दरबारात दररोज देशभरातील साईभक्त हजेरी लावत असतात आणि साईचरणी भरभरून दान देखील करतात. नाताळच्या सुट्यांनिमित्त शिर्डीत साई दर्शनाला आलेल्या देशभरातील भाविकांच्या वतीने साई चरणी भरभरून दान करण्यात आले असून सरत्या वर्षाला निरोप आणि नवीन वर्षाच्या स्वागतासाठी शिर्डीत आलेल्या भक्तांनी साईचरणी जवळपास १६ कोटींचे दान केले आहे.
शिर्डीतील साईबाबा संस्थानच्या वतीने नाताळ सुटीत सरत्या वर्षाला निरोप व नवीन वर्षाच्या स्वागतानिमित्त आयोजित करण्यात आलेल्या शिर्डी महोत्सवाचे दि. २३ डिसेंबर २०२३ ते दिनांक १ जानेवारी २०२४ या कालावधीत सुमारे ८ लाखांहून अधिक साईभक्तांनी साईबाबांच्या समाधीचे दर्शन घेतले. या कालावधीत सुमारे १५.९५ कोटी रुपये देणगी प्राप्त झाली असल्याची माहिती संस्थानचे प्र. मुख्य कार्यकारी अधिकारी तुकाराम हुलवळे यांनी दिली.
तसेच या कालावधीत साईप्रसादालयात ६ लाखांहून अधिक साईभक्तांनी मोफत प्रसाद भोजनाचा लाभ घेतला. तर सुमारे १ लाख २५ हजारांहून अधिक साईभक्तांनी अन्नपाकीटांचा लाभ घेतला आहे. याबरोबरच ११,१०,६०० लाडू प्रसाद पाकिटांची विक्री करण्यात आली असून याव्दारे १ कोटी ४१ लाख ५५ हजार ५०० रुपये प्राप्त झालेले आहेत. याबरोबरच ७,४६,४०० साईभक्तांनी मोफत बुंदी प्रसाद पाकिटांचा लाभ घेतला.
असा होतो दानाचा विनियोग
साईबाबा संस्थानच्या वतीने प्राप्त झालेल्या दानाचा विनियोग हा साईबाबा हॉस्पिटल व साईनाथ रुग्णालय, साईप्रसादालय मोफत भोजन, संस्थानच्या विविध शैक्षणिक संस्था, बा रुग्णांना चॅरिटीकरिता, साईभक्तांकरिता घेण्यात येणारे विविध उपक्रम व विविध सामाजिक कामांकरता करण्यात येत असल्याचे हुलवळे यांनी सांगितले.
