पुणे : भारतीय हवामान विभागाच्या अंदाजानुसार, महाराष्ट्रात पुढील तीन दिवसांत म्हणजेच १६ ते १८ मे दरम्यान विविध भागांमध्ये वादळी पावसाची शक्यता आहे. राज्यातील काही जिल्ह्यांमध्ये विजांसह वादळ, गारपीट आणि जोरदार वा-यांचा इशारा देण्यात आला आहे.
भारतीय हवामान विभागाने २०२५ च्या मान्सून संदर्भात महाराष्ट्रासाठी आशादायक अंदाज वर्तवला आहे. या अंदाजानुसार, जून ते सप्टेंबर या कालावधीत राज्यात सरासरीहून अधिक पावसाची शक्यता आहे. आयएमडीच्या दीर्घकालीन अंदाजानुसार, देशभरातील पावसाचे प्रमाण सरासरीच्या १०५% ते ५% असण्याची शक्यता आहे. म्हणजेच, सामान्याहून अधिक पाऊस पडण्याची शक्यता आहे. अंदमान-निकोबार बेटांवर मान्सून २२ मेच्या सुमारास दाखल होतो, परंतु यावर्षी तो नऊ दिवस आधीच पोहोचल्याने पावसाळ्याची सुरुवात लवकर होण्याचे संकेत मिळाले आहेत. मराठवाडा, दक्षिण महाराष्ट्र आणि विदर्भ या भागांमध्ये सरासरीहून अधिक पावसाची शक्यता वर्तवण्यात आली आहे. या भागांमध्ये पावसाचे प्रमाण अधिक असण्याची शक्यता आहे.
मुंबई आणि कोकण किनारपट्टी
मुंबईसह कोकणातील भागांमध्ये विजांसह वादळ, हलका ते मध्यम पाऊस आणि ४० ते ५० किमी/तास वेगाने वारे होण्याची शक्यता आहे. आयएमडीने मुंबईसाठी १७ मेपर्यंत यलो अलर्ट जारी केला आहे.
नागपूर, अकोला, अमरावती, चंद्रपूर
नागपूरमध्ये तापमान ४१ अंशावर पोहोचले असून पुढील दोन दिवसांत विजांसह वादळ आणि पावसामुळे तापमानात घट होण्याची शक्यता आहे. या भागांमध्ये ३० ते ४० किमी/तास वेगाने वारे, विजांचा कडकडाट आणि हलका पाऊस होऊ शकतो.
मराठवाडा आणि पश्चिम महाराष्ट्र
मराठवाडा, पुणे, कोल्हापूर, सातारा, सोलापूर या भागांमध्ये वादळी पाऊस, विजांचा कडकडाट आणि गारपीट होण्याची शक्यता आहे. या हवामानामुळे शेती, वाहतूक आणि जनजीवनावर परिणाम होऊ शकतो.
नागरिकांसाठी प्रशासनाच्या महत्त्वाच्या सूचना
– आवश्यक नसल्यास घराबाहेर पडणे टाळा.
– शेतक-यांनी पिकांचे संरक्षण करण्यासाठी योग्य ती खबरदारी घ्यावी.
– प्रशासनाच्या सूचनांचे पालन करावे.
– हवामान विभागाच्या अद्ययावत माहितीसाठी अधिकृत संकेतस्थळे तपासावीत.
– मराठवाडा, दक्षिण महाराष्ट्र आणि विदर्भ या भागांमध्ये सरासरीहून अधिक पावसाची शक्यता
शेतक-यांसाठी महत्त्वपूर्ण
या अंदाजामुळे राज्यातील शेतक-यांना शेतीच्या नियोजनासाठी मदत होऊ शकते. सरासरीहून अधिक पावसामुळे खरीप हंगामासाठी पाण्याची उपलब्धता वाढेल, ज्यामुळे पीक उत्पादनात वाढ होण्याची शक्यता आहे.
