छत्रपती संभाजीनगर – न्यायालय व न्यायालयीन प्रक्रियेवर अवमानकारक व आक्षेपार्ह वक्तव्य केल्याप्रकरणी शिवसेना (उद्धव बाळासाहेब ठाकरे) नेते, राज्यसभा सदस्य संजय राजाराम राऊत यांच्यासह इतर प्रतिवादींना नोटीस बजावण्याचे आदेश मुंबई उच्च न्यायालयाच्या औरंगाबाद खंडपीठाचे न्यायमूर्ती एस. सी. मोरे व न्यायमूर्ती वैशाली जाधव-पाटील यांनी दिले आहेत.
या प्रकरणी ॲड. अमित देशपांडे यांनी ॲड. शैलेंद्र गंगाखेडकर यांच्यामार्फत फौजदारी अवमान याचिका दाखल केली आहे. या याचिकेनुसार शिवसेना नेते, खासदार संजय राऊत यांनी सर्वोच्च न्यायालय आणि उच्च न्यायालय आणि एकूणच न्यायव्यवस्था यांच्याविषयी अनेकवेळा अवमानकारक वक्तव्य विविध माध्यमांवर केले आहे. या प्रकरणी न्यायालयाच्या अवमानाविषयी राज्याचे तत्कालीन महाधिवक्ता यांचेकडे संजय राऊत व इतर यांच्याविरोधात अवमान याचिका दाखल करण्यासंदर्भात कायद्यान्वये संमती मागितली होती.
खासदार संजय राऊत यांनी केलेल्या अवमानकारक वक्तव्यांचा विचार करून राज्याचे विद्यमान महाधिवक्ता डॉ. मिलिंद साठे यांनी अँड अमित देशपांडे यांना फौजदारी अवमान याचिका दाखल करण्यासंदर्भात परवानगी दिली. त्या अनुषंगाने ॲड अमित देशपांडे यांनी मुंबई उच्च न्यायालयाच्या औरंगाबाद खंडपीठात फौजदारी अवमान याचिका ॲड शैलेंद्र गंगाखेडकर यांचे मार्फत दाखल केली.
संजय राऊत यांनी केलेली अवमानकारक वक्तव्य टीव्ही नाइन मराठी, एबीपी माझा, आपलं महानगर,दिव्य मराठी आणि महाराष्ट्र टाइम्स इत्यादी माध्यमांवर प्रसिद्ध झाले होते. म्हणून याचिकेत प्रतिवादी असलेल्या या सर्व माध्यमांच्या संपादकांनाही सदर फौजदारी अवमान याचिकेत कोर्टाने नोटीस काढून हजर राहण्याचे आदेश दिले आहेत.
