लातूर : प्रतिनिधी
नांदेड येथे १३ सप्टेंबर रोजी अनुसूचित जाती आरक्षणातील उपवर्गीकरणाच्या समर्थनार्थ आयोजित मोर्चादरम्यान माजी मंत्री लक्ष्मण ढोबळे यांनी महार समाजातील महिला व मुलींबाबत कथितरीत्या आक्षेपार्ह, अवमानकारक व जातीय तेढ निर्माण करणारे वक्तव्य केल्याच्या निषेधार्थ गुरुवारी लातूर शहरातील गांधी चौक येथे महिलांनी जोडे मारो आंदोलन केले. यावेळी ढोबळे यांना त्वरित अटक करा अशा घोषणांनी परिसर दुमदुमून गेला.
या कथित वक्तव्यामुळे बौद्ध समाजातील महिला, मुली व कुटुंबीय व समाजाच्या भावना दुखावल्याचा आरोप आंदोलनकर्त्या महिलांनी केला. सार्वजनिक मंचावरून एका विशिष्ट समाजातील महिलांविषयी अपमानास्पद, लैंगिक स्वरूपाची भाषा वापरणे ही गंभीर बाब असून, दोषींवर कारवाई झाली पाहिजे, अशी मागणी करण्यात आली.
आंदोलनानंतर गांधी चौक पोलीस निरीक्षक, जिल्हाधिकारी यांना निवेदन देण्यात आले. या निवेदनावर आशाताई चिकटे, सुजाता अजनीकर, सरिता बनसोडे, अर्चना जाधव, मयुरी अल्टे, त्रिशला घोडके, नीता अजनीकर, रेखा घोबाळे, ज्योती कांबळे, मीरा कांबळे, कविता कदम, निर्मला गौरकर, ललिता गायकवाड, बबीता गुळवे, शशिकला सुरवसे, कमलबाई गाडे, विद्या सुरवसे, प्रमिला आपटे, मीनाक्षी गंडले, सुबीद्रा कांबळे, मीना कदम, विनोद कोल्हे, विलास चक्रे, अक्षय धावारे, ज्ञानेश्वर सुरवसे, उमाकांत धावारे, सुफी सय्यद, बबलू गवळी, राजेश कदम, मिलिंद धावारे यांच्यासह शेकडो महिलांच्या स्वाक्ष-या आहेत.
