मुंबई : प्रतिनिधी
गेल्या १० दिवसांपासून सुरू असलेल्या गणेशोत्सवाची शुक्रवारी (२५ सप्टेंबर) सांगता झाली आहे. घरोघरी आणि सार्वजनिक मंडळांमध्ये विराजमान झालेल्या लाडक्या गणरायाला निरोप देण्यात आला आहे. मुंबई, पुणे, छत्रपती संभाजीनगर, नागपूरसह राज्यभरातील गणेश मंडळांनी बाप्पाचं विसर्जन केलं आहे. ढोल-ताशांचा गजर आणि गुलालाची उधळण करत ‘गणपती बाप्पा मोरया, पुढच्या वर्षी लवकर या’ असा जयघोष करत भाविकांनी आपल्या लाडक्या विघ्नहर्त्याला निरोप दिला.
मुंबई आणि पुण्यात शनिवारीही गणपती बाप्पाच्या विसर्जन मिरवणुका सुरू होत्या. लाडक्या गणरायाला निरोप देताना अनेकजण भावूक झाल्याचे पाहायला मिळाले आहेत. मुंबईतील गणेश विसर्जन सोहळा हा देशभरातील भाविकांसाठी लक्षणीय सोहळा असतो. मुंबईचा राजा, परळचा महाराजा, चिंचपोकळीचा चिंतामणी, लालबागचा राजा या गणपतींचं गिरगाव चौपाटीवर विसर्जन होत असतं. या गणपती बाप्पांच्या विसर्जन सोहळ्याची जंगी मिरवणूक निघते. यावर्षी मुंबईत दुस-या दिवशी म्हणजे शनिवारी (२६ सप्टेंबर) सकाळी ११ पर्यंत विसर्जन मिरवणुका सुरू होत्या.
मुंबईतील लालबागच्या राजाची विसर्जन मिरवणूक शुक्रवारी दुपारी सुरू झाली होती, त्यानंतर दुस-या दिवशी म्हणजे शनिवारी सकाळी लालबागचा राजा गिरगांवच्या समुद्रकिनारी दाखल झाला होता. लालबागच्या राजाच्या विसर्जन मिरवणुकीत गणेशभक्तांची मोठी गर्दी पाहायला मिळाली. त्यानंतर अखेर लालबागच्या राजाचं गिरगांव चौपाटीवर विसर्जन संपन्न झालं आहे. मुंबईतील लालबागच्या राजाचं २२ ते २३ तासांच्या भव्य मिरवणुकीनंतर लालबागचा राजाचं स्थानिक कोळी बांधवांच्या मदतीने विसर्जन पार पडलं आहे.
गिरगांव चौपाटीवर झाली होती मोठी गर्दी
ढोल-ताशांचा गजर, ‘गणपती बाप्पा मोरया, पुढच्या वर्षी लवकर या’ अशा जयघोष आणि पाणावलेल्या डोळ्यांनी गणपतीला निरोप देण्यासाठी गिरगांव चौपाटीवर भाविकांचा जनसागर लोटला होता. गणेशभक्तांनी गिरगाव चौपाटीवर मोठी गर्दी केली होती. परिसरात उत्साहाचे आणि भावनिक वातावरण निर्माण झालं होतं.
पुण्यातील दगडूशेठ गणपतीचे विसर्जन
पुण्यातील श्रीमंत दगडूशेठ हलवाई गणपतीचे पांचाळेश्वर घाटावर विसर्जन करण्यात आले आहे. बेलबाग चौकातून दुपारी ४ वाजता मिरवणूकीला सुरवात झाली होती. त्यानंतर श्रीमंत दगडूशेठ गणपती बप्पाचं विसर्जन रात्री ८ वाजून २५ मिनिटांनी करण्यात आलं.
