जालोर : हृदयविकाराचा त्रास सुरू असताना करण्यात आलेली शस्त्रक्रिया यशस्वी झाल्यानंतर एका भाविकाने भगवान सांवळिया सेठ यांची कृपा मानून आपला नवस पूर्ण केला. सर्वसाधारणपणे भाविक देवाला सोन्या-चांदीचे दागिने, मुकुट किंवा इतर मौल्यवान वस्तू अर्पण करतात. मात्र, हृदयावरील उपचार यशस्वी झाल्यानंतर सोन्याचे हृदय अर्पण करण्याची या भाविकाची श्रद्धा सध्या चर्चेचा विषय ठरली आहे.
मिळालेल्या माहितीनुसार, राजस्थानमधील जालोर येथील या भाविकाला हृदयाशी संबंधित आजार होता. उपचार सुरू असताना त्याने भगवान सांवळिया सेठ यांच्याकडे प्रकृती उत्तम होण्यासाठी प्रार्थना केली होती. तसेच आपली मनोकामना पूर्ण झाल्यास देवाला सोन्याचे हृदय अर्पण करण्याचा नवसही केला होता.
उपचार आणि शस्त्रक्रिया यशस्वी झाल्यानंतर या भाविकाने आपला नवस पूर्ण करण्याचा निर्णय घेतला. त्यानुसार तो मेवाडमधील प्रसिद्ध कृष्णधाम असलेल्या श्री सांवळियाजी मंदिरात पोहोचला. हृदयविकाराच्या त्रासातून सुखरूप बाहेर पडल्यानंतर या भाविकाने चित्तौडगड जिल्ह्यातील मंडफिया येथील भगवान सांवळिया सेठ यांची कृपा मानून आपला शब्द पूर्ण केला. मंदिरात पोहोचल्यानंतर त्याने देवाच्या चरणी सोन्यापासून तयार केलेले हृदयाच्या आकाराचे मॉडेल अर्पण केले. पूर्णपणे सोन्यापासून तयार करण्यात आलेल्या या हृदयाचे वजन तब्बल २१ ग्रॅम आहे. त्याची किंमत ३ लाख रुपयांपेक्षा अधिक असल्याचे सांगितले जात आहे.
