पुणे : पुण्याहून गुवाहाटीकडे निघालेल्या इंडिगोच्या विमानात उड्डाणानंतर काही वेळातच मोठा तांत्रिक बिघाड झाल्याने एकच खळबळ उडाली. विमानाचे लँडिंग गिअर उड्डाणानंतर आत न घेता आल्याने विमानाचे पुणे विमानतळावर तातडीने इमर्जन्सी लँडिंग करण्यात आले. या विमानात एकूण १९२ प्रवासी आणि क्रू मेंबर्स होते. विमानाचे तात्काळ लँडिंग केल्याने मोठा अनर्थ टळला असून सर्व प्रवासी सुखरूप आहेत.
रविवारी सकाळी इंडिगोचे ६ई ०६२३ हे विमान पुण्याहून गुवाहाटीच्या दिशेने निघाले होते. पण टेक ऑफ केल्यानंतर विमानाची चाके नेहमीप्रमाणे आत न जाता बाहेरच राहिली. हा तांत्रिक बिघाड लक्षात येताच वैमानिकाने तात्काळ एअर ट्रॅफिक कंट्रोलला याबाबत माहिती दिली.
हवाई दलाकडून फुल इमर्जन्सी जाहीर
पुणे विमानतळ भारतीय हवाई दलाच्या तळावरून चालवले जात असल्याने, माहिती मिळताच हवाई दलाने विमानतळावर फुल इमर्जन्सी जाहीर केली. विमानतळ प्रशासन, एटीसी आणि आपत्कालीन यंत्रणांना हाय अलर्टवर ठेवण्यात आले. अग्निशमन दलाच्या गाड्या, रुग्णवाहिका रनवेवर तैनात करण्यात आली.
धावपट्टीवरून लो पास आणि सुरक्षित लँडिंग
विमान खाली उतरवण्यापूर्वी जमिनीवरील तज्ज्ञांना लँडिंग गिअरची प्रत्यक्ष पाहणी करता यावी, यासाठी वैमानिकाने खबरदारीचा उपाय म्हणून धावपट्टीवरून विमान जमिनीच्या अगदी जवळून उडवून पाहिले. त्यानंतर सकाळी ९ वाजून ४ मिनिटांनी हे विमान पुणे विमानतळावर सुरक्षितपणे उतरवण्यात आले.
सर्व १९२ प्रवासी सुखरूप; पर्यायी विमानाची व्यवस्था
लँडिंगनंतर विमानाला बे क्रमांक ७ वर नेण्यात आले. विमान पूर्णपणे सुरक्षित असल्याची खात्री पटल्यानंतर सकाळी ९ वाजून १० मिनिटांनी एटीसीने फुल इमर्जन्सी मागे घेतली. त्यानंतर विमानाला एरोब्रिज जोडून सर्व १९२ प्रवासी आणि कर्मचा-यांना सुखरूप खाली उतरवण्यात आले. या घटनेत कोणालाही दुखापत झालेली नाही. प्रवाशांच्या पुढील प्रवासासाठी इंडिगो कंपनीकडून दुसरे विमान मागवण्याची व्यवस्था करण्यात आली आहे.
लँडिंग गिअर आत न गेल्यास काय होते?
विमानाचे लँडिंग गिअर जर आत गेले नाही, तर हवेचा दाब वाढतो आणि वेगावर परिणाम होतो, ज्यामुळे लांबचा प्रवास करणे धोक्याचे ठरू शकते. मात्र, चाके बाहेरच असल्याने लँडिंगच्या वेळी मोठा धोका निर्माण होत नाही. वैमानिकाने विमान तात्काळ पुण्यात परत आणल्याने मोठा अनर्थ टळला आहे.
