नवी दिल्ली : भारताने कॅनडाच्या नागरिकांसाठी ई-व्हिसा सेवा पुन्हा सुरू केली आहे. कॅनडातील भारतीय उच्चायुक्तांनी नुकतीच घोषणा केली की भारताने पात्र कॅनेडियन नागरिकांसाठी इलेक्ट्रॉनिक व्हिसा सेवा पुन्हा सुरू करण्याचा निर्णय घेतला आहे. या निर्णयानंतर परराष्ट्र मंत्री एस जयशंकर यांचे वक्तव्य समोर आले आहे. जयशंकर म्हणाले की, भारताने व्हिसा जारी करणे तात्पुरते स्थगित केले होते कारण कॅनडातील परिस्थितीमुळे आमच्या राजदूतांना तेथे काम करणे कठीण झाले होते. मात्र, आता परिस्थिती पूर्वीपेक्षा सुधारली आहे आणि सुरक्षित झाली आहे.
बुधवारी व्हर्च्युअल जी २० लीडर्स समिटच्या समाप्तीनंतर पत्रकार परिषदेला संबोधित करताना जयशंकर म्हणाले की, अनेक श्रेणींमध्ये फिजिकल व्हिसा सुरू झाला आहे. परराष्ट्र मंत्री एस जयशंकर म्हणाले की, ई-व्हिसाबाबतच्या निर्णयाचा जी २० बैठकीशी काहीही संबंध नव्हता. आम्ही व्हिसा जारी करणे तात्पुरते स्थगित केले होते कारण कॅनडातील परिस्थिती भारतीय राजदूतांना काम करण्यायोग्य नव्हती. पण आता व्हिसा प्रक्रियेसाठी आवश्यक काम करणे सोपे झाले आहे. सध्याच्या परिस्थितीत थोडीशी सुधारणा झाल्यानंतरच आम्हाला हळूहळू व्हिसा सेवा पुन्हा सुरू करणे शक्य झाले आहे.
कॅनडातील भारतीय उच्चायुक्तांनी जारी केलेल्या अधिसूचनेत असे नमूद केले आहे की भारतीय ई-व्हिसा सुविधा २२ नोव्हेंबर २०२३ पासून नियमित/सामान्य कॅनेडियन पासपोर्ट धारक असलेल्या सर्व पात्र कॅनेडियन नागरिकांसाठी पुनर्स्थापित करण्यात आली आहे. कॅनेडियन पासपोर्टच्या इतर कोणत्याही श्रेणीच्या धारकांनी विद्यमान प्रक्रियेनुसार नियमित पेपर व्हिसासाठी अर्ज करणे आवश्यक आहे. ओटावा येथील भारतीय उच्चायुक्तालयाच्या संबंधित वेबसाइटवर तपशील मिळू शकतात.
