मुंबई : प्रतिनिधी
स्वस्तात उपचार आणि योजनांचा लाभ मिळतो म्हणून कित्येक लोक सरकारी रुग्णालयात जातात. पण या रुग्णालयातील धक्कादायक प्रकार समोर आला आहे. इथं बनावट ड्रग्ज पुरवठा होत असल्याचं उघड झालं आहे. औषधाच्या गोळ्या मध्ये टॅल्कम पावडर, स्टार्च असल्याचं समोर आलं आहे.
बनावट ड्रग्ज प्रकरणात ग्रामीण पोलिसांनी २० सप्टेंबर रोजी १२०० पानी आरोपपत्रात सादर केलं आहे. यात धक्कादायक तथ्य उघड झाले आहे. सरकारी रुग्णालयांमध्ये वितरित करण्यात आलेली अँटीबायोटिक्स ज्यात स्टार्च आणि टॅल्कम पावडर होती जी हरिद्वारस्थित पशुवैद्यकीय औषधांच्या प्रयोगशाळेत बनवली गेली होती.
सरकारी रुग्णालयांना बनावट औषधांचा धक्कादायक पुरवठा करण्याव्यतिरिक्त, रॅकेटर्सनी मुंबईहून उत्तर प्रदेशातील सहारनपूर येथे कोट्यवधी रुपये हस्तांतरित करण्यासाठी हवाला चॅनेलचा सर्रास वापर केला. उत्तर प्रदेश, झारखंड, छत्तीसगड आणि महाराष्ट्रातील रुग्णालयांसह संपूर्ण भारतभर पुरवठा करण्यात येणारी बनावट औषधे खरेदी करण्यासाठी रॅकेटर्सकडे रोख हस्तांतरित करण्यात आली.
नागपुरातील कळमेश्वर येथील ग्रामीण रुग्णालयात पुरवठा करण्यात येणारी प्रतिजैविक औषधं बनावट असल्याचं औषध निरीक्षक नितीन भांडारकर यांच्या निदर्शनास आलं. गेल्या वर्षी डिसेंबरमध्ये धक्कादायक बाब समोर आली होती. औषध निरीक्षकांनी गेल्या वर्षी कळमेश्वर पोलिस ठाण्यात पुरवठादार आणि वितरकांवर गुन्हा दाखल केला होता. सिव्हिल सर्जन कार्यालयाने पाठपुरावा करून या कंपन्यांना काळ्या यादीत टाकले होते.
तपासात धक्कादायक तथ्ये उघड
नागपूर ग्रामीण पोलिसांच्या तपासात धक्कादायक तथ्ये उघड झाल्यानंतर, अशाच प्रकारचे गुन्हे वर्धा, नांदेड, ठाणे आणि महाराष्ट्रातील इतरत्र रॅकेटर्सवर दाखल करण्यात आले. म्हस्के म्हणाले की, हेमंत मुळे याने नागपूर येथील शासकीय रुग्णालयांना औषध पुरवठा करण्याच्या टेंडरमध्ये सहभाग घेतला होता. मुळे यांच्याशिवाय मिहीर त्रिवेदी आणि विजय चौधरी यांच्यावरही गुन्हे दाखल आहेत.
