नांदेड: प्रतिनिधी
हडको भागातील शाहूनगर परिसरात राहणा-या एका युवकाचा पूर्व वैमनस्यातून सिडको भागात धारधार शस्त्राने वार करून खून केल्याची घटना शुक्रवारी मध्यरात्री घडली. गुन्हा दाखल होताच याप्रकारणी ५ संशयीतांना पोलिसांनी पकडले आहे.
मुळ बळीरामपूर येथील रहिवासी संघरत्न माधव वाघमारे वय १९ हल्ली मुक्काम शाहूनगर हडको नांदेड या युवकाचा पूर्व वैमनस्यातून ५ ते ६ जणांनी मिळून शुक्रवारी रात्री सिडको परिसरात धारधार शस्त्राने वार करून खून केला. ही घटना शनिवारी सकाळी उघडकीस आली. घटनेची माहिती मिळताच ग्रामीण पोलीस ठाण्याचे निरीक्षक चिंचोळकर व त्यांच्या सहका-यांनी घटनास्थळी भेट देऊन पाहणी केली.
याप्रकरणी राजदीप दीपक तारू, प्रवीण उर्फ बबलू रावसाहेब तारू, आदर्श उर्फ अनिल संजय लोहकरे, साईनाथ उर्फ साई राजू धुमाळे ,आदेश संजय कांबळे, व महादेव आनंदा नवघरे सर्व रा. शाहूनगर हडको यांच्याविरूद्धमयताची आई पंचशीला माधव वाघमारे यांनी दिलेल्या फिर्यादीवरून ग्रामीण पोलीस ठाण्यामध्ये खुनाचा गुन्हा दाखल करण्यात आला आहे. सदर घटनेतील संशयीत ५ आरोपींना पोलिसांनी ताब्यात घेतले असल्याची माहिती मिळाली. स्थानिक गुन्हे शाखा व ग्रामीण पोलीस आरोपीचा शोध घेण्यासाठी शुक्रवारी पहाटेपासूनच अनेक भागात रवाना झाले होते.
