मुंबई : प्रसिद्ध गायक सोनू निगम गेल्या आठवड्यापासून मज्जातंतूशी संबंधित एका वेदनादायक समस्येशी झुंज देत आहे आणि त्यावर वैद्यकीय उपचार घेत आहे. अनेक वैद्यकीय तपासण्या, औषधोपचार आणि फिजिओथेरपी सुरू असतानाही त्यांनी मुंबईतील नियोजित कार्यक्रम रद्द न करण्याचा निर्णय घेतला आहे.
सोशल मीडियावर शेअर केलेल्या एका व्हीडीओमध्ये सोनू निगम यांनी सांगितले की, त्यांच्या काही नसांवर दाब आल्यामुळे त्यांना तीव्र वेदना होत आहेत. या समस्येचे नेमके स्वरूप समजून घेण्यासाठी त्यांनी गेल्या आठवडाभरात अनेक एमआरआय आणि सीटी स्कॅन तपासण्या केल्या आहेत. माझ्या नसांवर दाब आला आहे. गेल्या आठवडाभरापासून एमआरआय आणि सीटी स्कॅन करत आहे. अनेक औषधेही घेत आहे, असे त्यांनी सांगितले.
उपचार प्रक्रियेविषयी माहिती देताना सोनू म्हणाले की, फिजिओथेरपीचा अनुभव अत्यंत वेदनादायक ठरला आहे. वेदना कमी करण्यासाठी त्यांना पेनकिलर्स घ्यावे लागत आहेत. फिजिओथेरपी खूपच वेदनादायक होती. सध्या मी वेदनाशामक औषधे घेत आहे. त्यामुळे माझा घसाही थोडा जड झाला आहे, असे त्यांनी सांगितले. स्नायूंना आराम देण्यासाठी दिल्या जाणा-या औषधांचा परिणाम त्यांच्या आवाजावरही होत असल्याचे त्यांनी नमूद केले.
तब्येत बिघडली तरी कार्यक्रम रद्द नाही
आरोग्याच्या अडचणी मान्य करताना सोनू निगम यांनी स्पष्ट केले की, ते कोणत्याही परिस्थितीत आपला कार्यक्रम रद्द करणार नाहीत. ब-याच काळानंतर पुन्हा रंगमंचावर परफॉर्म करण्याची संधी मिळत असल्याने चाहत्यांना दिलेले वचन पूर्ण करण्याचा त्यांचा निर्धार आहे.
चाहत्यांकडून शुभेच्छांचा वर्षाव
सोनू निगम यांचा व्हीडीओ सोशल मीडियावर व्हायरल होताच चाहत्यांनी त्यांच्या प्रकृतीबद्दल चिंता व्यक्त केली. अनेकांनी त्यांना लवकर बरे होण्यासाठी शुभेच्छा दिल्या, तर काहींनी कठीण परिस्थितीतही कामाप्रती असलेली त्यांची निष्ठा आणि जिद्द यांचे कौतुक केले.
