अहमदाबाद : स्वयंघोषित संत आसाराम बापूच्या शिक्षेविरोधात दाखल करण्यात आलेल्या याचिकेवर गुजरात उच्च न्यायालयाने सुनावणी सुरू करण्याचा निर्णय घेतला आहे. हे प्रकरण २०१३ च्या बलात्कार प्रकरणाशी संबंधित आहे. आसाराम बापूचे वाढते वय पाहता न्यायालयाने याचिकेवर सुनावणी सुरू करण्याचा निर्णय घेतला. यासोबतच आसाराम बापू जवळपास एक दशकापासून तुरुंगात शिक्षा भोगत असल्याची वस्तुस्थितीही न्यायालयाने विचारात घेतली. ४ एप्रिलपासून न्यायालयात त्याच्या याचिकेवर सुनावणी सुरू होणार आहे.
न्यायालयाने म्हटले की, मुख्य अपील आणि शिक्षेला स्थगिती देण्याच्या याचिकेवर सुनावणीसाठी कालमर्यादा आहे. अशा परिस्थितीत आम्ही ४ एप्रिलपासून मुख्य अपीलावर सुनावणी करू. उन्हाळ्याच्या सुट्टीपूर्वी अपीलची सुनावणी पूर्ण करण्याचा आमचा प्रयत्न असेल, जेणेकरून आम्ही सुट्ट्यांनंतर निर्णय देऊ शकू, असेही न्यायालयाने म्हटले आहे.
आसाराम बापूला जानेवारी २०२३ मध्ये सुरत आश्रमात अनेक वेळा त्यांच्या शिष्यांवर बलात्कार केल्याप्रकरणी गुजरातच्या एका ट्रायल कोर्टाने दोषी ठरवले होते. आसाराम बापूवर भारतीय दंड संहितेच्या कलम ३७६ (बलात्कार), ३७७ (अनैसर्गिक लैंगिक संबंध), ३५४ (महिलेच्या प्रतिष्ठेला ठेच पोहोचवणे), ३४६ (चुकीने बंदिस्त करणे), १२०बी (गुन्हेगारी कट) आणि २०१ (पुरावा नष्ट करणे) अंतर्गत गुन्हा दाखल करून दोषी ठरवण्यात आले.
अहमदाबादमधील चांदखेडा पोलिस स्टेशनमध्ये दाखल करण्यात आलेल्या एफआयआरनुसार, पीडितेला आसाराम बापूने सुरत शहराच्या बाहेरील आश्रमात ओलीस ठेवले होते आणि २००१ ते २००६ दरम्यान तिच्यावर वारंवार बलात्कार केला होता. लैंगिक गुन्ह्यांशी संबंधित दोन वेगवेगळ्या प्रकरणांमध्ये ते आधीच जन्मठेपेची शिक्षा भोगत आहेत.
