रियो-द-जेनेरिओ : वृत्तसंस्था
पाच वेळचा फुटबॉल विश्वविजेता संघ असे बिरूद मिरवणा-या ब्राझीलने हैतीचा ३-० असा पराभव करत २०२६ फिफा विश्वचषकातील आपल्या पहिल्या विजयाची नोंद केली. मॅथियस कुन्हाने केलेल्या दोन गोलच्या जोरावर संघाने ‘ग्रुप सी’मध्ये अव्वल स्थान गाठले आहे.
ब्राझील संघाला पहिल्या सामन्यात मोरोक्कोविरुद्ध १-१ अशा बरोबरीत समाधान मानावे लागले होते. त्यामुळे चाहत्यांच्या नजरा हैतीविरुद्धच्या सामन्याकडे लागल्या होत्या. ब्राझीलला या सामन्यात पुनरागमन करणे गरजेचे होते.
हैतीविरुद्ध पूर्वार्धातच ब्राझीलचे वर्चस्व
सामन्याच्या २३ व्या मिनिटाला ब्राझीलने खेळावर नियंत्रण मिळवले, मात्र या पहिल्या गोलमध्ये नशिबाचीही थोडी साथ लाभली. विनिसियसने हैतीचा गोलरक्षक जॉनी प्लेसाईडच्या दिशेने शॉट मारला. गोलरक्षकाने तो शॉट अडवला खरा, पण डिफेंडर हॅनेस डेलक्राईक्सने बॉल क्लिअर करण्याचा प्रयत्न केला असता तो कुन्हाच्या अंगाला लागून थेट गोलपोस्टच्या रेषेबाहेर गेला. या स्वयंचलित गोलमुळे ब्राझीलला १-० अशी आघाडी मिळाली.
कुन्हाने डागले दोन गोल
या पहिल्या गोलमुळे ब्राझीलचा आत्मविश्वास वाढला आणि त्यांनी खेळावर पूर्ण वर्चस्व गाजवण्यास सुरुवात केली. ३६ व्या मिनिटाला कुन्हाने सामन्यातील सर्वांत प्रेक्षणीय गोल करत संघाला २-० अशी आघाडी मिळवून दिली. विनिसियसने दिलेल्या अचूक ‘थ्रू बॉल’वर या स्ट्रायकरने रिकाम्या जागेचा अचूक फायदा घेतला आणि डाव्या पायाने एक उत्कृष्ट आणि वेगवान शॉट मारत बॉल थेट टॉप कॉर्नरमध्ये धाडला. पूर्वार्धाच्या भरपाई वेळेत ब्राझीलने आपला तिसरा गोल नोंदवला.
