नांदेड : प्रतिनिधी
जिल्ह्यात वाढत्या सायबर आर्थिक गुन्ह्यांना आळा घालण्यासाठी स्थानिक गुन्हे शाखेने मोठी कारवाई करत म्युल बँक अकाउंट रॅकेटचा पदार्फाश केला आहे. या प्रकरणी २ आरोपींविरुद्ध सायबर पोलीस ठाण्यात गुन्हा दाखल करण्यात आला असून तपासादरम्यान सुमारे १९.४१ लाख रुपयांच्या संशयास्पद आर्थिक व्यवहारांचा मागोवा लागला आहे.
पोलीसांना मिळालेल्या गोपनीय माहितीच्या आधारे रेल्वे स्थानकासमोरील गवळीपुरा परिसरात सापळा रचून एका संशयिताला ताब्यात घेण्यात आले. चौकशीत त्याची ओळख हर्षदसिंह राजूसिंह अरोरा (रा. बु-हाणपूर, मध्य प्रदेश) अशी झाली. त्याच्याकडून ६० विविध बँकांची पासबुक, एटीएम कार्डे, विविध कंपन्यांची ८ सिमकार्डे व इतर साहित्य जप्त करण्यात आले. पुढील तपासात बालाजी सोपान गुंजाळे (रा. बळीरामपूर) याचा सहभाग समोर आला असून तो आरोपी हर्षद सिंह अरोरा याला खातेधारक उपलब्ध करून त्याचे बँक खाते व एटीएम काढून देत होता.
प्राथमिक तपासात आरोपी नागरिकांना पैशांचे आमिष दाखवून त्यांच्या नावाने विविध बँकांमध्ये खाती उघडत होते. ही खाती सायबर फसवणुकीतून मिळणारी रक्कम स्वीकारण्यासाठी वापरली जात असल्याचे उघड झाले. एनसीसीआरपी पोर्टल आणि मनी ट्रेल विश्लेषणातून देशभरातील ऑनलाइन गुंतवणूक, डिजिटल अरेस्ट, शेअर मार्केटसह विविध प्रकारच्या सायबर फसवणुकीतील रक्कम या खात्यांमधून फिरवल्याचे निष्पन्न झाले आहे. आरोपी प्रत्येक खात्यामागे कमिशन स्वीकारत असल्याची माहितीही तपासात समोर आली आहे.
या प्रकरणी भारतीय न्याय संहिता, २०२३ मधील संबंधित कलमे तसेच माहिती तंत्रज्ञान अधिनियम २००० मधील कलम ६६ (सी) व ६६(डी) अंतर्गत गुन्हा दाखल करण्यात आला असून पुढील तपास सायबर पोलीस करीत आहेत.
