परभणी : येथील जिल्हा शल्यचिकित्सक डॉ. नागेश लखमावार यांच्या निलंबनाच्या निषेधार्थ जिल्हा रुग्णालयातील डॉक्टर, परिचारिका व कर्मचा-यांनी शुक्रवार, दि. १४ ऑगस्ट रोजी सकाळी ८ वाजल्यापासून कामबंद आंदोलन सुरू करण्यात आले. या आंदोलनामुळे रुग्णालयातील कामकाज ठप्प झाले होते. दरम्यान शिवसेना नेते आनंद भरोसे यांनी दिलेल्या आश्वासनानंतर आंदोलन तात्पुरते मागे घेण्यात आले आहे.
जिंतूर येथील गर्भवती मातेसह बाळाच्या मृत्यू प्रकरणात हलगर्जीपणाचा ठपका ठेवत जिल्हा शल्यचिकित्सक डॉ. लखमावार यांच्यावर निलंबनाची कारवाई करण्यात आली आहे. या कारवाईमुळे जिल्हा रुग्णालयातील डॉक्टर व कर्मचा-यांत तीव्र असंतोष निर्माण झाला आहे. संतप्त कर्मचा-यांनी निलंबन मागे घेण्याच्या मागणीसाठी आक्रमक भूमिका घेत शुक्रवारी सकाळ पासून कामबंद आंदोलन सुरू केले. अतिरिक्त जिल्हा शल्यचिकित्सक डॉ. सारिका बडे, नानलपेठ पोलिस निरीक्षक गणेश कदम, शिवसेना नेते आनंद भरोसे यांच्यासह संबंधितांनी आंदोलनस्थळी भेट देऊन कर्मचा-यांशी चर्चा केली. शिवसेना नेते भरोसे यांनी दि. १८ ऑगस्टपर्यंत मंत्री महोदयांशी चर्चा करून डॉ. लखमावार यांचे निलंबन रद्द करण्यासाठी प्रयत्न करण्याचे आश्वासन दिले. त्यानंतर कर्मचा-यांनी ४ तासांनंतर कामबंद आंदोलन मागे घेतले. आता दि. १८ ऑगस्टपर्यंत निलंबनाबाबत काय निर्णय होतो. याकडे जिल्हा रुग्णालयातील डॉक्टर व कर्मचा-यांचे लक्ष लागले आहे.
अधिष्ठातांची ३ तासानंतर आंदोलकांशी भेट
आंदोलन सुरू असताना अतिरिक्त जिल्हा शल्यचिकित्सक डॉ. सारिका बडे व कर्मचा-यांनी रुग्णालयाचे अधिष्ठाता रविंद्र चव्हाण यांना परिस्थितीचे गांभीर्य लक्षात घेऊन तातडीने जिल्हा रुग्णालयात येण्याची फोनद्वारे विनंती केली. परंतू तब्बल ३ तासानंतर ते रुग्णालयात दाखल झाल्याचा आरोप कर्मचा-यांनी केला आहे. रुग्णालयात आल्यानंतरही अधिष्ठात्यांकडून आंदोलनकर्त्या कर्मचा-यांना कोणतेही ठोस आश्वासन मिळाले नसल्याने कर्मचा-यांनी तीव्र नाराजी व्यक्त केली.
