कल्याण : अंगावर काटा आणणारी घाटकोपरमधील होर्डिंग दुर्घटना ताजी असतानाच आता कल्याणमध्ये देखील होर्डिंग कोसळण्याची घटना समोर आली आहे. कल्याणमध्ये भलंमोठं होर्डिंग कोसळल्याचा व्हीडीओ समोर आला आहे.
या होर्डिंगखाली अनेक वाहने दबली गेली आहेत. या दुर्घटनेत कोणतीही जीवितहानी झाली नाही. मात्र, घटनास्थळी नागरिकांमध्ये भीतीचे वातावरण निर्माण झाले. या दुर्घटनेनंतर रस्त्यावर मोठ्या प्रमाणात वाहतूक कोंडी निर्माण झाल्याचे दिसून आले.
मिळालेल्या माहितीनुसार, कल्याणमध्ये मोठे होर्डिंग कोसळल्याची घटना घडली. कल्याणमधील सहजानंद चौकात हे होर्डिंग कोसळल्याची घटना घडली आहे. या दुर्घटनेत २ जण जखमी झाल्याची माहिती समोर आली आहे. होर्डिंग दुर्घटनेत कोणतीही जीवित हानी झालेली नाही. मात्र, होर्डिंग थेट वाहनांवर कोसळल्याने अनेक गाड्यांचे मोठे नुकसान झाले आहे.
होर्डिंग दुर्घटनेचा व्हीडीओ व्हायरल
कल्याण पश्चिममधील सहजानंद चौकात आज (शुक्रवारी) सकाळी १० वाजण्याच्या सुमारास ही घटना घडल्याची माहिती आहे. या वेळी या परिसरात मोठी रहदारी असते. होर्डिंग कोसळल्याने वाहनांचे मोठ्या प्रमाणावर नुकसान झाले आहे. या होर्डिंगजवळ रुग्णालयासहित अनेक दुकाने समोर आलेल्या व्हीडीओमध्ये दिसत आहेत. वाहनांची पार्किंगही घटनास्थळी होती.
