हैदराबाद : भ्रष्टाचाराविरुद्ध सुरू असलेल्या धडक कारवाईदरम्यान तेलंगणमध्ये एक धक्कादायक प्रकार समोर आला आहे. हैदराबाद मेट्रोपॉलिटन डेव्हलपमेंट अथॉरिटीचे मुख्य अभियंता बी. रविंदर यांच्यावर उत्पन्नाच्या स्रोतापेक्षा अधिक संपत्ती जमवल्याचा आरोप झाला आहे. याप्रकरणी तेलंगणच्या लाचलुचपत प्रतिबंधक विभागाने गुन्हा दाखल करत त्यांच्या विविध ठिकाणांवर एकाच वेळी छापे टाकले.
या कारवाईदरम्यान हाती लागलेल्या घबाडामुळे तपास यंत्रणाही चक्रावून गेली आहे. एसीबीने दिलेल्या माहितीनुसार, जप्त केलेल्या कागदपत्रांनुसार या मालमत्तेची अधिकृत किंमत ९.२४ कोटी रुपये आहे. सध्याच्या बाजारभावानुसार या मालमत्तेची खरी किंमत तब्बल १०० कोटी रुपये असल्याचा अंदाज वर्तवला जात आहे. एसीबीच्या सिटी रेंज-१ पथकाने मंगळवारी बी. रविंदर यांचे घर, कार्यालय आणि त्यांच्याशी संबंधित इतर ९ ठिकाणांवर ही शोधमोहीम राबवली. तपास यंत्रणेने रविंदर यांच्या नातेवाईकांसह त्यांचे निकटवर्तीय आणि गुंतवणूकदारांच्या मालमत्तांवरही गदा आणली आहे. या मोहिमेत मोठ्या प्रमाणावर जंगम आणि स्थावर मालमत्तेची कागदपत्रे जप्त करण्यात आली आहेत.
यामध्ये हैदराबाद परिसरातील कोंडाकल व किस्मतपूर येथील ५ मोकळे भूखंड, नरसिंगी आणि नानकरामगुडा येथील ४ आलिशान फ्लॅट्स, शमशाबाद परिसरातील ४ एकर शेतजमीन, मोकिला येथील एक सेमी-फिनिश्ड व्हिला आणि कोंडापूर भागातील एका व्यावसायिक इमारतीचा समावेश आहे.
