वृंदावन : वृंदावनच्या प्रेमानंद महाराजांची ख्याती संपूर्ण जगभरात पसरली आहे. सोशल मीडियावर त्यांचे व्हीडीओ मोठ्या प्रमाणात व्हायरल होतात. याच कारणामुळे त्यांच्या प्रवचनाला देशाच्या कानाकोप-यातून भक्त येतात. सामान्य व्यक्तीं व्यतिरिक्त ते सेलिब्रिटींपर्यंत अनेक लोक वृंदावन येथे प्रेमानंद महाराजांपुढे नतमस्तक होतात. अशा वेळी अनेकजण महाराजांना काही प्रश्न विचारतात. काही प्रश्न ऐकून तर खुद्द प्रेमानंद महाराजांनाच हसू येते. नुकताच असाच एक प्रश्न एका भक्ताने प्रेमानंद महाराजांना विचारला.
सध्या असाच एक व्हीडीओ सोशल मीडियावर मोठ्या प्रमाणात व्हायरल होत आहे. या व्हीडीओमध्ये एका भक्ताने प्रेमानंद महाराजांना विचारले की, मी एका खासगी कंपनीत नोकरी करतो. अनेकदा महत्त्वाचे काम असूनही आम्हाला सुटी मिळत नाही. पण, जर आजी, काकी किंवा कुटुंबातील अन्य व्यक्तींच्या मृत्यूचे खोटे कारण सांगितले तर मात्र लगेच सुटी मिळते.
व्यक्तीने पुढे सांगितले की, ऑफिसमध्ये खरे सांगून सुटी मागितली तर कधीच मिळत नाही. पण, खोटे सांगून सुटी मागितली तर लगेच मिळते. भक्ताच्या याच प्रश्नाला जोडून दुस-या व्यक्तीने सांगितले की, जर प्रत्येक दीड महिन्यांनी वृंदावनला येण्यासाठी सुटी मागितली तर ती कधीच मिळणार नाही. मी आजही ऑफिसमध्ये खोटे कारण देऊन आलो आहे. तर, खोटे कारण देऊन सुटी घेणे पाप आहे का?
भक्ताच्या या प्रश्नाला उत्तर देत असताना प्रेमानंद महाराज हसले आणि म्हणाले की, हा कलियुगाचा प्रभाव आहे. खोटं घेणं आणि खोटं देणं, खोटं खाणं आणि खोटं पचवणं. पण, काहीही असो खोटं बोलणं हे पापच आहे. याविषयी सविस्तर सांगताना प्रेमानंद महाराजांनी एक श्लोक सांगितला. सांच बराबर तप नहीं, झूठ बराबर पाप, जांके हृदय ताप है. तांके हृदय आप. याचा अर्थ खरेपणाशिवाय कोणतीच मोठी तपस्या नाही आणि खोटं बोलण्यासमान कोणते पाप नाही. ज्याच्या मनात खरेपणा आहे. त्याच्याच मनात देव वसतो.
प्रेमानंद महाराज पुढे म्हणाले की, आपल्याला प्रत्येक समस्येशी लढता आले पाहिजे. तसेच, नेहमी सत्याच्या मार्गावर चालण्याचा प्रयत्न करावा. आयुष्याच्या प्रत्येक वळणावर खोटं बोलावं. तसं पाहिलं तर, भजन, कीर्तन आणि देवाच्या प्राप्तीसाठी खोटं बोलणं पाप नसतं. जर देवाच्या नावावर तुम्ही जर खोटं बोलत असाल तर ते पाप नाही.
