मुंबई : काही दिवस असे असतात जे आपल्या नेहमी लक्षात राहतात. त्यातील काही चांगले तर काही वाईट प्रसंगही असतात. पण खरंच काळा दिवस ज्याला म्हणता येईल असा एक दिवस भारतातील प्रत्येकाच्या नशिबात आला. तो होता २६ नोव्हेंबर २००८ होय. १५ वर्षांपूर्वी नोव्हेंबरच्या २६ तारखेला मुंबईत अनेक ठिकाणी दहशतवादी हल्ले झाले. अजमल कसाब याच्यासह १० जणांचा या हल्ल्यात सहभाग होता. मुंबईतील पंचतारांकित हॉटेल्स, कामा हॉस्पिटल, मुंबईचा श्वास असलेले छत्रपती शिवाजी महाराज टर्मिनस यांच्यावर दहशतवाद्यांनी हल्ले चढवले होते.
कोणावरही दया दाखवायची नाही, कोणालाही जात विचारायची नाही, दिसेल त्याला ठार करत जायचं एवढंच या दहशतवाद्यांना पढवण्यात आलं होतं. आणि त्यांनी हेच केलं.
२६/११ च्या हल्ल्यात सहभागी झालेल्या दहशतवाद्यांना पाकिस्तानातून पाठवण्यात आले होते आणि त्यांना उच्च प्रशिक्षित करण्यात आले होते. हे सर्वजण भारतात प्रवेश करण्यासाठी सागरी मार्गाने आले होते. दहशत पसरवणे आणि नागरिकांचे अपहरण प्रकरणातून काही प्रमुख दहशतवाद्यांची सुटका करणे हा त्यांचा मुख्य उद्देश होता.
मुंबई दहशतवादी हल्ल्याची योजना अनेक महिने आधीच तयार करण्यात आली होती. या हल्ल्यात सहभागी असलेल्या दहशतवाद्यांनी भारत-बांगलादेश सीमेवरून खरेदी केलेले तीन सिमकार्ड वापरले होते. यापैकी एक सिमकार्ड अमेरिकेच्या न्यू जर्सी राज्यात खरेदी केल्याचेही वृत्त होते.
त्यानंतर २१ नोव्हेंबर २००८ रोजी नियोजनबद्ध पद्धतीने दहा दहशतवादी पाकिस्तानातून गुजरातमार्गे बोटीतून भारतात आले. जाताना त्यांनी चार मच्छिमारांना ठार मारले.
२६ नोव्हेंबर २००८ रोजी दहशतवाद्यांनी कॅप्टनची हत्या केली आणि स्पीडबोटीतून कुलाब्याच्या दिशेने निघाले. मुंबईत प्रवेश करण्यापूर्वी दहशतवादी एलएसजी, कोकेन आणि स्टेरॉईड्सचे सेवन करायचे जेणेकरून ते जास्त काळ अ‍ॅक्टिव्ह राहू शकतील.
यानंतर दहशतवाद्यांनी मुंबईत प्रवेश करताच ताज हॉटेल, ओबेरॉय ट्रायडंट आणि नरिमन हाऊसवर हल्ला केला. ताज हॉटेलमध्ये सुमारे सहा स्फोट झाले, ज्यात अनेक लोक ठार झाले. दहशतवाद्यांनी लोकांना ४ दिवस ओलीसही ठेवले होते आणि अंदाधुंद गोळीबारात अनेकांना ठार केले होते. मुंबईत वेगवेगळ्या ठिकाणी झालेल्या या दहशतवादी हल्ल्यात सुमारे १९७ जणांचा मृत्यू झाला होता, तर ६०० हून अधिक लोक जखमी झाले होते. या हल्ल्यात सर्व दहशतवादी मारले गेले मात्र मोहम्मद अजमल आमिर कसाब जिवंत पकडला गेला. ज्याला २१ नोव्हेंबर २०१२ रोजी येरवडा तुरुंगात फाशी देण्यात आली होती.
जिवंत पकडण्यात आलेला एकमेव दहशतवादी अजमल कसाब याच्यावर शस्त्रास्त्र कायदा, बेकायदेशीर कारवाया प्रतिबंधक कायदा, स्फोटक कायदा, सीमाशुल्क कायदा, देशाविरुद्ध युद्ध पुकारणे आणि रेल्वे कायद्याच्या विविध कलमांखाली गुन्हा दाखल करण्यात आला आहे.
या हल्ल्यात निवृत्त सैनिक तुकाराम ओंबाळे आणि मुंबई पोलिसांचे सहायक उपनिरीक्षक यांनी एकमेव जिवंत दहशतवादी अजमल कसाबला पकडण्यासाठी आपल्या प्राणांची आहुती दिली. ओंबाळे यांना कर्तव्याच्या ओळीत असामान्य शौर्य आणि पराक्रमासाठी अशोक चक्राने सन्मानित करण्यात आले.
या हल्ल्यांमध्ये कमीतकमी १९७ व्यक्ती ठार झाल्या. तर २९३ जण जखमी झाले होते. परदेशी नागरिकांपैकी चार ऑस्ट्रेलियन, चार अमेरिकन, तीन केनेडियन, तीन जर्मन, दोन इस्रायली-अमेरिकन, दोन इस्रायली, दोन फ्रेंच तर प्रत्येकी एक ब्रिटिश-सायप्रॉइट, चिनी, इटालियन, जपानी, जॉर्डनी, मलेशियन, मॉरिशयन, मेक्सिकन, सिंगापुरी, थाई आणि मेक्सिकन लोकांचा समावेश होता.
