पंढरपूर (दिनेश खंडेलवाल) : पुरुषोत्तम मास म्हणजेच अधिक महिन्यातील दुसऱ्या कमला एकादशीनिमित्त तीर्थक्षेत्र पंढरपूर अक्षरश: भक्तीच्या लाटेत न्हाऊन निघाले आहे. महाराष्ट्राच्या कानाकोपऱ्यातून आलेल्या लाखो वारकरी भाविकांच्या उपस्थितीमुळे संपूर्ण पंढरी नगरी ‘जय हरी विठ्ठल’च्या गजराने दुमदुमून गेली आहे.
वारकरी संप्रदायामध्ये अधिक महिन्यातील कमला एकादशीला अनन्यसाधारण महत्त्व आहे. या पर्वाचा लाभ घेण्यासाठी पहाटेपासूनच वारकरी भाविकांनी चंद्रभागेच्या पवित्र पात्रात स्नान करण्यासाठी अलोट गर्दी केली होती. चंद्रभागा स्नान आणि विठ्ठल दर्शन हा वारकऱ्यांच्या श्रद्धेचा मुख्य केंद्रबिंदू असल्याने, पहाटेपासूनच भाविकांची मोठी ओढ पाहायला मिळाली.
पंढरपुरातील प्रदक्षिणा मार्गावर आज भक्तीमय वातावरण अनुभवायला मिळाले. विविध संतांच्या दिंड्या, हातात टाळ-मृदुंग आणि खांद्यावर पताका घेऊन भाविक हरिनामाचा जयघोष करत प्रदक्षिणा पूर्ण करत होते. ‘अधिकंम अधिकस्य’ या उक्तीप्रमाणे, अधिक महिन्यात केलेल्या भक्तीचे फळ अधिक मिळते, या श्रद्धेने भाविकांचा उत्साह ओसंडून वाहत होता.
एकादशीच्या दिवशी भगवान विष्णूचे रूप असलेल्या विठ्ठलाची पूजा करून वारकरी उपवास करतात. कमला एकादशीचे व्रत अतिशय नियम, श्रद्धा आणि विश्वासाने पाळले जाते. पौराणिक आख्यायिकेनुसार, या व्रताचे फळ हे अश्वमेध यज्ञ, घोर तपस्या आणि तीर्थयात्रेपेक्षाही अधिक पुण्यदायी मानले जाते. याच फलश्रुतीच्या आशेने यंदाच्या अधिक महिन्याच्या सुरुवातीपासूनच दररोज लाखांच्या संख्येने भाविक पंढरपुरात दाखल होत आहेत.
चंद्रभागा वाळवंट परिसर, मंदिर परिसर आणि प्रदक्षिणा मार्ग सर्वत्र भक्तीचे वातावरण निर्माण झाले आहे. मुखातून निघणारा हरिनामाचा गजर आणि मृदुंगाच्या तालावर होणारे नामस्मरण यामुळे संपूर्ण पंढरपूर नगरी भक्तीच्या रंगात न्हाऊन निघाली आहे. उपवास आणि नामस्मरणाच्या माध्यमातून मोक्ष प्राप्तीची कामना करत प्रत्येक वारकरी आज विठ्ठलाच्या दर्शनासाठी व्याकुळ झालेला दिसून आला.
