छ. संभाजीनगर/बीड : प्रतिनिधी
आठवडाभराच्या विश्रांतीनंतर मराठवाड्यातील काही भागांनंतर राज्यात ब-याच ठिकाणी आज पावसाने हजेरी लावली. यामुळे काही प्रमाणात शेतक-यांना दिलासा मिळाला. छ. संभाजीनगर, जालना, बीड, परभणी, जिल्ह्यातील काही भागांत बुधवारी दुपारी पाऊस झाला. तसेच लातूर जिल्ह्यातही काही ठिकाणी हलक्या सरी कोसळल्या. त्यामुळे शेतक-यांच्या आशा पल्लवित झाल्या आहेत. त्यातच मोठ्या पावसाची प्रतीक्षा असून, आता पाऊस झाल्यास कोवळ््या पिकाला दिलासा मिळणार आहे.
मागच्या आठ दिवसांपासून राज्यातून पाऊस गायब झाला होता. त्यातच मराठवाड्यात तर सर्वसाधारण पाऊस झालेला असतानाच अचानक गायब झाला. त्यामुळे ब-याच भागांत अद्याप पेरणी रखडली आहे. मोजक्याच शेतक-यांनी साधारण पावसावर पेरणी केल्याने कोवळी पिकेही करपत आहेत. अशावेळी बुधवारी काही भागांत आकाशात ढग दाटून आले आणि आठवडाभराच्या विश्रांतीनंतर पावसाने हजेरी लावली. त्यामुळे शेतक-यांना दिलासा मिळाला. मराठवाड्यात छत्रपती संभाजीनगर आणि जालना जिल्ह्यात काही भागांत आज दमदार पाऊस झाला. यासोबतच बीड जिल्ह्यातही केज, अंबाजोगाई तालुक्यात पावसाने हजेरी लावली.
अंबाजोगाई तालुक्यातील कुंबेफळ, वरपगाव, राडी, सातेफळ आणि कानडी परिसरात आज दुपारी वा-यासह पावसाने जोरदार बॅटिंग केली.याशिवाय परभणी जिल्ह्यातही जिंतूर तालुक्यात पाऊस झाला आहे. त्यातच लातूर जिल्ह्यातही आज दुपारी ढग दाटून आले होते. परंतु काही भागांत हलक्याशा सरी कोसळल्या. त्यामुळे शेतक-यांच्या आशा पल्लवित झाल्या असून, लवकरच दमदार पाऊस कोसळेल, अशी आशा आहे. मराठवाड्यात पाऊस झाला तरच दुष्काळी संकट टळेल अन्यथा बिकट स्थिती उद्भवू शकते.
यासोबतच राज्यात रायगड जिल्ह्यात कर्जत, खोपोली, खालापूर परिसरात पावसाच्या जोरदार सरी बरसल्या आहेत. जिल्ह्यात पूर ओसरल्यानंतर पावसाने दांडी मारली होती. अखेर आज उत्तर रायगड सह दक्षिण भागातदेखील पावसाने हजेरी लावली. बदलापूरमध्ये सकाळपासूनच पावसाची रिमझिम सुरू होती. कात्रप, बेलवली, वडवली आणि पनवेल मार्गावर जोरदार पाऊस झाला.
तुरळक ठिकाणीच हजेरी
मराठवाड्यात ब-याच ठिकाणी पावसाने हजेरी लावली असली तरी हा पाऊस तुरळक आणि कमी प्रमाणात झाल्याने शेतक-यांच्या अपेक्षा अद्याप पूर्ण झालेल्या नाहीत. या साधारण पावसामुळे रस्त्यांवर पाणी साचले, वातावरण प्रसन्न झाले आणि नागरिकांनीही दिलासा व्यक्त केला. मात्र शेतीच्या दृष्टीने हा पाऊस अद्याप अपुरा असल्याचे चित्र आहे.
