सुनसरी : भारत-नेपाळ सीमेला लागून असलेल्या नेपाळच्या सुनसरी जिल्ह्यात रविवारी रात्री उशिरा दोन धार्मिक समुदायांमध्ये संघर्ष झाला. परिस्थिती बिघडल्यावर पोलिसांनी गोळीबार केला, ज्यात २४ वर्षीय ओम प्रकाश मेहता यांचा मृत्यू झाला. डझनहून अधिक लोक जखमी झाले आहेत. यात सुरक्षा कर्मचा-यांचाही समावेश आहे.
हा संघर्ष देवगंज ग्रामीण नगरपालिकेच्या कप्तानगंज परिसरात झाला. दोन्ही समुदाय तिथे वेगवेगळे धार्मिक कार्यक्रम करत होते. याच दरम्यान लाऊडस्पीकर वाजवण्यावरून आणि धार्मिक झेंडे लावण्यावरून वाद झाला. बघता बघता या प्रकरणाने हिंसक रूप धारण केले. घटनेनंतर प्रशासनाने सोमवारी सकाळी ७ वाजल्यापासून ५ बाजारपेठांच्या परिसरात अनिश्चित काळासाठी निर्बंध लादले आहेत. आता या परिसरात ४ पेक्षा जास्त लोक एकत्र जमू शकणार नाहीत. मिरवणुका, निदर्शने, धरणे आणि सार्वजनिक सभांवरही बंदी घालण्यात आली आहे. पोलिसांनी सांगितले की, परिसरात अतिरिक्त सुरक्षा दल तैनात करण्यात आले आहे. परिस्थितीवर लक्ष ठेवले जात आहे.
अमेरिकेतील सिएटलमध्ये रविवारी संध्याकाळी बाइट ऑफ सिएटल फूड फेस्टिव्हलदरम्यान झालेल्या गोळीबारात २ लोकांचा मृत्यू झाला, तर ५ लोक जखमी झाले. जखमींमध्ये २ वर्षांच्या मुलाचाही समावेश आहे. पोलिसांनी संपूर्ण परिसर वेढला असून प्रकरणाचा तपास करत आहेत. सध्या कोणालाही अटक झाल्याची पुष्टी झालेली नाही. गोळीबार संध्याकाळी सुमारे ६ वाजता झाला, जेव्हा फेस्टिव्हल संपणार होता. घटनेनंतर घटनास्थळी गोंधळ उडाला आणि लोक जीव वाचवण्यासाठी इकडे-तिकडे धावू लागले. अनेक विक्रेते आपले स्टॉल सोडून पळून गेले.
अग्निशमन दलाच्या माहितीनुसार, जखमींना रुग्णालयात दाखल करण्यात आले आहे. यापैकी एका ५६ वर्षीय महिलेची प्रकृती गंभीर आहे, तर २ वर्षांचे बाळ, एक २३ वर्षीय युवक आणि ३९ वर्षीय महिलेची प्रकृती स्थिर असल्याचे सांगण्यात आले आहे. वॉशिंग्टनचे गव्हर्नर बॉब फर्ग्युसन यांनी घटनेबद्दल दु:ख व्यक्त करत सांगितले की, राज्य पोलिसांचे स्वॉट पथक स्थानिक पोलिसांना मदत करत आहे. पोलिसांनी लोकांना घटनास्थळापासून दूर राहण्याचे आवाहन केले आहे.
