बंगळूरू : कर्नाटकच्या या हायव्होल्टेज राजकीय नाट्याचा अखेर क्लायमॅक्स समोर आला असून, मुख्यमंत्री सिद्धरामय्या यांनी अखेर आपल्या मुख्यमंत्रीपदाचा राजीनामा देण्याची अधिकृत घोषणा करीत राजीनामा दिला आहे. आपल्या निवासस्थानी आयोजित केलेल्या ब्रेकफास्ट मीटिंग दरम्यान त्यांनी भावूक वातावरणात हा मोठा निर्णय मंत्र्यांसमोर जाहीर केला. या घोषणेसोबतच कर्नाटकातील काँग्रेस सरकारमध्ये आता मोठ्या नेतृत्वबदलावर शिक्कामोर्तब झाले असून कर्नाटकचे नवे मुख्यमंत्री म्हणून डीके शिवकुमार शपथ घेतील.
आज सकाळी ९ वाजता मुख्यमंत्र्यांच्या निवासस्थानी ही बैठक सुरू होणार होती, मात्र ती एक तास उशिराने म्हणजेच १० वाजता सुरू झाली. मुख्यमंत्री सिद्धरामय्या स्वत: एक तास उशिराने डायनिंग टेबलपाशी पोहोचले, जिथे सर्व मंत्री त्यांची वाट पाहत होते. अत्यंत भावनिक वातावरणात सिद्धरामय्या यांनी आपण पद सोडत असल्याचे जाहीर केले, ज्यामुळे बैठकीत काही काळ शांतता पसरली होती.
दिल्लीहून परतलेले उपमुख्यमंत्री डी. के. शिवकुमार विमानतळावरून थेट सिद्धरामय्या यांच्या शासकीय निवासस्थानी दाखल झाले. यावेळी कर्नाटक काँग्रेसमध्ये कोणताही वाद नसल्याचा संदेश देण्यासाठी दोन्ही नेत्यांनी एकमेकांना घट्ट मिठी (गळाभेट) मारली. इतकेच नाही तर, डी. के. शिवकुमार यांनी सिद्धरामय्या यांच्या पाया पडून त्यांचे आशीर्वाद घेतले. या दृश्यामुळे कर्नाटकात आता डी. के. शिवकुमार यांच्याच राज्याभिषेकाची तयारी पूर्ण झाल्याचे स्पष्ट संकेत मिळत आहेत.
ब्रेकफास्टचा दाक्षिणात्य बेत
सिद्धरामय्या यांच्या घरी मंत्र्यांसाठी खास दाक्षिणात्य बेत आखण्यात आला होता. मेन्यूमध्ये मऊ इडली, गरमागरम वडा आणि खमंग मसाला डोसा होता. यासोबतच पोंगल, उप्पित (उपीट), केसरीबाथ, सागू, सांभर आणि चटणीचा आस्वाद मंर्त्यांनी घेतला. मात्र, या चवदार भोजनासोबतच राजकारणाचा मसाला अधिक कडू-गोड ठरला.
राज्यपालांअभावी राजीनाम्याचा पेच कायम
सिद्धरामय्या यांनी राजीनाम्याची घोषणा केली असली आणि ते सकाळी ११ वाजता राजभवनावर जाणार असले, तरी राज्यपाल थावरचंद गेहलोत हे बंगळुरूत हजर नाहीत. ते बुधवारी मध्यरात्रीच ‘इमर्जन्सी’मुळे मुंबई आणि तिथून इंदूरला रवाना झाले आहेत. त्यामुळे सिद्धरामय्या आपला राजीनामा राजभवनाच्या वरिष्ठ अधिका-यांकडे सोपवणार की राज्यपालांच्या ई-मेलवर पाठवणार, याकडे आता सर्वांचे लक्ष लागले आहे.
