परभणी : जिल्ह्यातील मानवत शहरात एमडी (मेफेड्रोन) या अमली पदार्थाच्या प्रकरणात पोलिसांनी केलेल्या कारवाईला आता मोठे यश मिळाले असून २६ जुलै रोजी ७३ ग्रॅम एमडी ड्रग्ज जप्त करून दोघांना अटक केल्यानंतर त्यांच्या कसून चौकशीतून आणखी ६ आरोपींची नावे समोर आली. त्यानुसार पोलिसांनी ८ ऑगस्ट रोजी रात्री कारवाई करत ६ जणांना अटक केली असता न्यायालयात हजर केले असता सर्व आरोपींना न्यायालयाने ४ दिवसांची पोलिस कोठडी सुनावली आहे. यामुळे या प्रकरणातील अटक आरोपींची संख्या आता ८ पोहोचली आहे.
मानवत तालुक्यातील रत्नापूर शिवारात २६ जुलै रोजी पोलिसांनी एमडी ड्रग्जची कारवाई करून ७३ ग्रॅम अमली पदार्थ जप्त केला होता. या वेळी दोघांना अटक करण्यात आली होती. सखोल चौकशीत अमली पदार्थाच्या पुरवठा साखळीतील आणखी व्यक्तींची माहिती मिळाल्याने पोलिसांनी तपासाची व्याप्ती वाढवली. या तपासातून परळी, लातूर आणि कळंबपर्यंत ड्रग्जच्या व्यवहाराचे धागेदोरे जोडले जात असल्याचे समोर आले आहे. स्थानिक गुन्हे शाखा आणि मानवत पोलिसांच्या संयुक्त पथकाने ही कारवाई केली. अटक करण्यात आलेल्या आरोपींची भूमिका, त्यांनी अमली पदार्थ कोठून मिळवला, कोणाला पुरवठा केला तसेच या व्यवहारात आणखी कोणाचा सहभाग आहे, याचा तपास पोलिसांकडून सुरू आहे.
दरम्यान पोलिसांनी अमली पदार्थाची किंमत १४ लाख ६४ हजार ४०० रुपयांचा अमली पदार्थ जप्त केल्याचे सांगितले. पोलिसांनी या प्रकरणी या दोघांवर गुन्हा दाखल करून तपास सुरू केला होता. ही कारवाई स्थानिक गुन्हे शाखेचे पोलिस निरीक्षक गजेंद्र सरोदे, मानवतचे पोलिस निरीक्षक दर्शन शिंदे आणि तपास अधिकारी पोलिस उपनिरीक्षक अनिल खिल्लारे यांच्या पथकाने केली. या प्रकरणात आणखी आरोपी निष्पन्न होण्याची शक्यता असून पोलिसांचा तपास सुरू आहे.
सर्व आरोपींना ४ दिवसांची पोलिस कोठडी
धाराशिव जिल्ह्यातील कळंब येथील एका नगरसेवकासह परळी आणि लातूर येथील ६ आरोपींना पोलिसांनी गजाआड करीत न्यायालयात हजर केले असता सर्व आठही आरोपींना न्यायालयाने ४ दिवसांची पोलिस कोठडी सुनावण्यात आली आहे.
अटकेतील आरोपींची नावे
अटक करण्यात आलेल्यांमध्ये मोसिन सलीम मिर्झा (वय ३८, रा. कळंब, जि. धाराशिव), आयान नासेर पठाण (वय २०, रा. बरकत नगर चौक, परळी, जि. बीड), शेख सलमान शेख खयुम (वय २८, रा. जुने रेल्वे स्टेशन, काक्कर मोहल्ला, परळी, जि. बीड), समीर शब्बीर सय्यद (वय ३१, रा. बरकत नगर, परळी, जि. बीड), अक्कीब आक्रमसाब मोमीन (वय ३१, रा. साळे गल्ली, लातूर) आणि बाबा रफिक मोमीन (वय ३४, रा. खाडगाव रोड, ख्वाजा नगर, लातूर) यांचा समावेश आहे.
