नवी दिल्ली : वृत्तसंस्था
लीड्समधील हेडिंग्ले इथे खेळल्या गेलेल्या सामन्यात मंधानाने ४७ चेंडूंमध्ये ७४ धावांची शानदार खेळी केली. तिच्या या खेळीत ११ चौकार आणि एका षटकाराचा समावेश होता. मंधानाने आपल्या शानदार फलंदाजीने टी-२० आंतरराष्ट्रीय क्रिकेटमध्ये ६०० चौकार मारून इतिहास रचला. यासह, ती पुरुष आणि महिला टी-२० आंतरराष्ट्रीय क्रिकेट या दोन्हीमध्ये ६०० पेक्षा जास्त चौकार मारणारी जगातील पहिली क्रिकेटपटू ठरली.
भारतीय महिला क्रिकेट संघाची उपकर्णधार स्मृती मंधाना आपल्या फलंदाजीने सातत्याने विक्रम करत आहे. यामुळेच प्रत्येक सामन्यात एक मोठा विक्रम रचला जातो किंवा मोडला जातो. आयसीसी महिला टी-२० विश्वचषक २०२६ मध्ये नेदरलँड्सविरुद्धच्या सामन्यात मंधानाने एक असा विश्वविक्रम रचला, जो पुरुष किंवा महिला क्रिकेटमधील कोणत्याही फलंदाजाने आजपर्यंत केलेला नाही.
स्पर्धेतील हे तिचे सलग दुसरे अर्धशतक होते. तिच्या शानदार खेळीमुळे भारताने २० षटकांत २०९ धावांचा डोंगर उभा केला आणि नंतर हा सामना ९५ धावांनी जिंकला. उत्कृष्ट कामगिरीबद्दल मंधानाला ‘सामनावीर’ म्हणून गौरविण्यात आले.
स्मृतीच्या नावावर आता टी-२० आंतरराष्ट्रीय क्रिकेटमध्ये एकूण ६०४ चौकार आहेत. या यादीत न्यूझिलंडची सुझी बेट्स ५२१ चौकारांसह दुस-या क्रमांकावर आहे, तर श्रीलंकेची चमारी अथापथ्थू ४९३ चौकारांसह तिस-या क्रमांकावर आहे. पुरुष क्रिकेटमध्ये, पाकिस्तानचा बाबर आझम सर्वाधिक चौकार मारणारा फलंदाज आहे, पण तोही मंधानाच्या मागे आहे. मंधाना केवळ चौकारांच्या बाबतीतच नव्हे, तर धावांच्या बाबतीतही अव्वल दोन खेळाडूंमध्ये आहे. महिलांच्या टी-२० आंतरराष्ट्रीय क्रिकेटमध्ये तिच्या नावावर ४,४७५ धावा आहेत. तिच्यापेक्षा फक्त न्यूझिलंडची सुझी बेट्स पुढे आहे, जिच्या नावावर ४,७२० धावा आहेत. मात्र, बेट्स सध्याच्या टी-२० विश्वचषकानंतर निवृत्त होणार असल्याने, मंधाना लवकरच हा विक्रम मोडेल अशी अपेक्षा आहे.
