कटिहार : काँग्रेस नेते राहुल गांधी यांची ‘भारत जोडो न्याय यात्रा’ सध्या बिहारमध्ये आहे. त्यांनी बुधवारी कटिहार येथे पदयात्रा केली. या प्रवासादरम्यान चेंगराचेंगरी झाली. यावेळी राहुल गांधी यांच्या गाडीचे नुकसान झाले. ते थोडक्यात बचावले.
राहुल गांधी कारमधून उतरून बसमध्ये बसले. राहुलच्या भारत जोडो यात्रेचा आज १८ वा दिवस आहे. राहुल गांधी यांचा हा प्रवास आज बिहारमधून बंगालमध्ये दाखल होणार आहे. राहुल गांधी या प्रवासात मिरचाईबारी डीएस कॉलेजमार्गे लाभा येथील जाहीर सभेनंतर ते बंगालला रवाना होतील.
न्याय मिळत नाही तोपर्यंत हा प्रवास
बिहारच्या दौ-यात राहुल गांधी म्हणाले की, बिहारच्या मातीवर अन्यायाविरोधात सुरू असलेल्या न्यायाच्या महायात्रेला जनतेचे भरभरून प्रेम आणि पाठिंबा मिळत आहे. न्याय हक्क मिळेपर्यंत हा प्रवास सुरूच राहणार आहे. आज ‘भारत जोडो न्याय यात्रा’ बिहारमधून पश्चिम बंगालमध्ये दाखल होत आहे. यावेळी बिहार काँग्रेसचे अध्यक्ष अखिलेश प्रसाद सिंह यांनी पश्चिम बंगाल काँग्रेसचे अध्यक्ष अधीर रंजन चौधरी यांना राष्ट्रध्वज सुपूर्द केला. ही यात्रा दुस-यांदा बंगालमध्ये दाखल होत आहे.
रस्त्याच्या दुतर्फा लोकांची गर्दी
काँग्रेस नेते राहुल गांधी यांनी बुधवारी बिहारमधील कटिहार जिल्ह्यात रोड शो करून ‘भारत जोडो न्याय यात्रा’ पुन्हा सुरू केली. कटिहार येथे रात्री थांबल्यानंतर, राहूल गांधींनी सकाळी आपली यात्रा सुरू केली आणि सकाळी ११:३० च्या सुमारास मालदामार्गे पश्चिम बंगालमध्ये प्रवेश करणे अपेक्षित आहे, असे पक्षाच्या एका नेत्याने सांगितले. रस्त्याच्या दुतर्फा रांगा लावून स्थानिकांनी राहूल गांधींना अभिवादन केले.
बिहार काँग्रेसचे अध्यक्ष अखिलेश प्रसाद सिंह यांनी दिलेल्या माहितीनुसार, राहूल गांधी काही दिवसांनी झारखंडमार्गे राज्यात परततील. १४ जानेवारीला मणिपूरमध्ये सुरू झालेली ‘भारत जोडो न्याय यात्रा’ ६७ दिवसांत ६,७१३ किमी अंतर कापून १५ राज्यांतील ११० जिल्ह्यांतून २० मार्च रोजी मुंबईत संपेल.
