नवी दिल्ली : १० डिसेंबरपासून सुरू होणा-या दक्षिण आफ्रिका दौ-यासाठी पुरुष क्रिकेट भारतीय संघाची घोषणा आधीच करण्यात आली होती. आता इंग्लंड आणि ऑस्ट्रेलियासोबतच्या टी-२० आणि कसोटी मालिकेसाठी बीसीसीआयने महिला क्रिकेट संघाची घोषणा केली आहे.
निवडकर्त्यांनी अवघ्या २४ तासांच्या कालावधीत ३ परदेशी संघांचा सामना करण्यासाठी भारतीय संघाची निवड केली. ३० नोव्हेंबर रोजी दक्षिण आफ्रिका दौ-यासाठी संघाची निवड झाल्यानंतर, १ डिसेंबर रोजी इंग्लंड आणि ऑस्ट्रेलियासोबत खेळल्या जाणा-या टी-२० आंतरराष्ट्रीय आणि कसोटी मालिकेसाठी भारताच्या १६ सदस्यीय संघाचीही घोषणा करण्यात आली.
भारतीय महिला क्रिकेट संघाला ६ ते १० डिसेंबर दरम्यान इंग्लंडसोबत ३ टी-२० सामने खेळायचे आहेत. १४ डिसेंबरपासून एकमेव कसोटी सामना खेळवला जाणार आहे. इंग्लंडनंतर भारताला ऑस्ट्रेलियाच्या महिला संघासोबत कसोटी खेळायची आहे, जी २१ डिसेंबरपासून मुंबईतील वानखेडे मैदानावर खेळवली जाणार आहे.
