मुंबई : आगामी बहुचर्चित चित्रपट ‘प्रहार’चा टीझर रिलीज झाला आहे. हा चित्रपट २००८ मधील मुंबईवरील २६/११ च्या दहशतवादी हल्ल्याच्या पार्श्वभूमीवर आधारित आहे. यामध्ये राजकुमार रावने वकील उज्ज्वल निकम यांची भूमिका साकारली आहे. उज्ज्वल निकम यांनी दहशतवादी अजमल कसाबला फाशीची शिक्षा मिळवून देण्यासाठी मोठा कायदेशीर लढा दिला होता.
१ मिनिट ५३ सेकंदांच्या या टीझरमध्ये राजकुमार राव वकील उज्ज्वल निकम यांच्या भूमिकेत दिसत आहे. २६/११ च्या हल्ल्याचा आरोपी अजमल कसाबला फाशी मिळवून देण्यासाठी तो न्यायालयात प्रयत्न करताना दिसतो. यादरम्यान तो कोर्टात आपले युक्तिवाद मांडतो. जेव्हा अजमल कसाबचे हल्ला करतानाचे फोटो आणि व्हीडीओ सर्वांसमोर आहेत, तर मग त्याला फाशी देण्यास उशीर का होत आहे? असा सवाल तो न्यायालयाला विचारताना दिसतो. याशिवाय ”याला मारु नका हा इव्हिडन्स आहे”, असा मराठीत संवाद तो करताना दिसतो.
टीझरमध्ये राजकुमार राव एका दमदार भूमिकेत दिसतोय. त्याच्या व्यतिरिक्त टीझरमध्ये अभिनेत्री वामिका गब्बी आणि जयदीप अहलावत यांचीही झलक पाहायला मिळत आहे. विशेष म्हणजे मराठमोळा अभिनेता ललित प्रभाकरचे अजमल कसाबच्या रुपातील जबरदस्त ट्रान्सफॉर्मेशन पाहून लोक थक्क झालेत. हा चित्रपट ७ ऑगस्ट २०२६ रोजी चित्रपटगृहात रिलीज होणार आहे.
