मुंबई : नुकताच अभिनेत्री कतरिना कैफने तिचा ४३ वा वाढदिवस साजरा केला. यानंतर आता तिने सोशल मीडियावर काही खास फोटो शेअर करत चाहत्यांना सरप्राईज दिले आहे. या फोटोंमध्ये तिच्यासोबत पती अभिनेता विकी कौशल आणि मुलगा वियानची झलकही पाहायला मिळत आहे.
विशेष म्हणजे, वियानचा चेहरा न दाखवता त्याचे काही गोंडस क्षण कॅमे-यात टिपले आहेत. १६ जुलै रोजी कतरिनाने तिचा वाढदिवस साजरा केला. हा वाढदिवस तिच्यासाठी खास ठरला, कारण मुलगा वियानसोबतचा तिचा हा पहिलाच वाढदिवस होता. आता तिने या खास दिवसाच्या आठवणी चाहत्यांसोबत सोशल मीडियावरून शेअर केल्या आहेत.
या पोस्टसोबत कतरिनाने भावनिक कॅप्शन देत लिहिले. ती म्हणते, ‘तू माझ्या आयुष्यातील सर्वांत अनमोल आशीर्वाद आहेस. देवाने दिलेल्या या सुंदर भेटीसाठी मी कायम आभारी आहे. हा माझ्या आयुष्यातील सर्वोत्तम वाढदिवस होता आणि त्यामागचे कारण तूच आहेस.’
फोटोंमध्ये कतरिना केशरी आणि निळ्या रंगाच्या आकर्षक ड्रेसमध्ये दिसत आहे. काही फोटोंमध्ये विकी कौशलही तिच्यासोबत दिसत असून, त्यांच्या कुटुंबातील हे खास क्षण चाहत्यांच्या मनाला भिडले आहेत. कतरिनाच्या या पोस्टवर चाहत्यांनी भरभरून प्रेम व्यक्त केले आहे.
फोटोंमध्ये कतरिना वियानला मांडीवर घेऊन प्रेमाने पोज देताना दिसते. एका फोटोत वियान आईचे नाक पकडताना दिसत असून, हा क्षण चाहत्यांच्या पसंतीस उतरला आहे. मात्र, कतरिनाने अद्याप मुलाचा चेहरा सार्वजनिक केलेला नाही.
