जम्मू : वृत्तसंस्था
जम्मू-काश्मीरमधील एलओसीजवळ अखनूर सेक्टरमधील भटाल परिसरात भारतीय जवान गस्त घालत असताना आयईडी स्फोट झाला. या स्फोटात लष्करातील कॅप्टन आणि एक जवान असे दोघे जण शहीद झाले तर आणखी एक जवान जखमी झाला असून, त्याच्यावर उपचार सुरू आहेत. मंगळवारी दुपारी ३.३० दरम्यान हा स्फोट झाला. त्यानंतर या भागात सर्च ऑपरेशन सुरू करण्यात आले.
दरम्यान, अखनूर सेक्टरमध्ये एक मॉर्टर शेलही सापडला. या शेलला बॉम्ब नाशक पथकाने निष्क्रिय केले. नामंदर गावाजवळ प्रतापनगर ओढ्यात स्थानिकांना हा सुरुंग गोळा सापडला. याची माहिती मिळताच पोलिसांचे पथक घटनास्थळी दाखल झाले. त्यानंतर बॉम्ब नाशक पथकाने हा सुरुंग निष्क्रिय केला आहे.
अतिरेक्यांची कंबर मोडणा-या लष्कराने आधी काश्मीर झोनच्या बारामुल्ला येथे शस्रास्र आणि दारुगोळा जप्त केला. लष्कर आणि पोलिसांनी केलेल्या संयुक्त कारवाईत नेजीले येथील उडी सेक्टरच्या अंगनपथरीच्या जंगलात सर्च ऑपरेशन केले. तेथे एके ४७ रायफल्स, एक एके मॅगेझिन, एक सायगा एमके रायफल, एक सायगा एमके रायफल असा शस्त्रसाठा सापडला.
