बार्बाडोस : वृत्तसंस्था
क्रिकेट इतिहासातील महान ऑलराउंडर आणि वेस्टइंडीजचे दिग्गज खेळाडू सर गारफील्ड सोबर्स यांचे वयाच्या ८९ व्या वर्षी निधन झाले. येत्या २८ जुलै रोजी त्यांचा ९० वा वाढदिवस होता. परंतु त्यापूर्वीच त्यांनी या जगाचा निरोप घेतला. त्यांच्या निधनानंतर क्रिकेट वेस्टइंडीजने सोशल मीडियावर पोस्ट शेअर करत सोबर्स यांना भावपूर्ण श्रद्धांजली वाहिली. सर गारफील्ड सोबर्स यांना जगभरात सर गॅरी सोबर्स या नावानेही ओळखले जाते.
सर गॅरी सोबर्स यांना क्रिकेट इतिहासातील सर्वांत संपूर्ण खेळाडू मानले जाते. त्यांनी फलंदाजी, गोलंदाजी आणि क्षेत्ररक्षण या तिन्ही आघाड्यांवर असा स्तर प्रस्थापित केला, ज्याचा आदर्श आजही दिला जातो. सोबर्स यांनी अशा काळात क्रिकेट खेळले, जेव्हा वेस्टइंडीजची टीम जागतिक क्रिकेटमध्ये सर्वात मजबूत आणि आक्रमक मानली जात होती. त्यांच्या अष्टपैलू कामगिरीमुळे त्यांचे नाव खेळाच्या इतिहासात सुवर्णअक्षरांनी कोरले गेले आहे.
टेस्ट क्रिकेटमध्ये रचला इतिहास
सर गारफील्ड सोबर्स यांनी सोबर्स यांनी १९५४ ते १९७४ या वीस वर्षांच्या प्रदीर्घ काळात विंडीजचे कसोटी क्रिकेटमध्ये प्रतिनिधित्व केले. वेस्टइंडीजसाठी ९३ कसोटी सामने खेळले. या दरम्यान त्यांनी १६० डावांमध्ये ५७.७८ च्या उत्कृष्ट सरासरीने ८,०३२ धावा केल्या. त्यांनी आपल्या कसोटी कारकिर्दीत २६ शतके, ३० अर्धशतके, दोन द्विशतके आणि एक त्रिशतक झळकावले. त्यांची नाबाद ३६५ धावांची सर्वोत्तम खेळी तत्कालीन कसोटी क्रिकेटमधील जागतिक विक्रम होती.
