लातूर : प्रतिनिधी
श्री गणेश विसर्जन मिरवणुकांच्या पार्श्वभूमीवर लातूर जिल्हा पोलीस दलाकडून व्यापक व काटेकोर बंदोबस्ताचे नियोजन करण्यात आले आहे. दि. २५ सप्टेंबर रोजी होणा-या गणेश विसर्जन मिरवणुका शांततेत, सुरक्षित वातावरणात आणि कोणताही अनुचित प्रकार न घडता पार पडाव्यात, यासाठी लातूर जिल्हा पोलीस दल सज्ज झाले आहे.
विसर्जनाच्या पार्श्वभूमीवर जिल्ह्यात १ अपर पोलीस अधीक्षक, ९ पोलीस उपअधीक्षक, २१ पोलीस निरीक्षक, ८० सहाय्यक पोलीस निरीक्षक व पोलीस उपनिरीक्षक तसेच १० नवप्रविष्ट पोलीस उपनिरीक्षक, असे १२१ पोलीस अधिकारी बंदोबस्तासाठी नियुक्त करण्यात आले आहेत. याशिवाय १ हजार ३७० पोलीस अंमलदार, १०० प्रशिक्षणार्थी पोलीस अंमलदार आणि १ हजार ०४० होमगार्ड यांचीही बंदोबस्तासाठी नियुक्ती करण्यात आली आहे. त्यासोबत राज्य राखीव पोलीस दलाची १ तुकडी आणि शीघ्र कृती दलाच्या ४ तुकड्या तैनात करण्यात आल्या आहेत.
जिल्ह्यातील जवळपास सर्वच गणेश मंडळांच्या विसर्जन मिरवणुकांच्या अनुषंगाने मिरवणूक मार्ग, प्रमुख चौक, गर्दीची ठिकाणे, विसर्जन स्थळे तसेच आवश्यक त्या संवेदनशील ठिकाणी पोलीस अधिकारी व अंमलदारांची नियुक्ती करण्यात आली आहे. मिरवणुकीची सुरक्षितता आणि कायदा व सुव्यवस्था अबाधित ठेवण्यासाठी परिस्थितीनुसार अतिरिक्त बंदोबस्ताचीही व्यवस्था करण्यात आली आहे. विसर्जनाच्या दिवशी शहर तसेच जिल्ह्यातील महत्त्वाच्या ठिकाणी सतत गस्त घालण्याची व्यवस्था करण्यात आली आहे. गर्दीची ठिकाणे, मिरवणूक मार्ग, संवेदनशील भाग आणि प्रमुख चौकांवर पोलिसांची विशेष देखरेख राहणार आहे. आवश्यकतेनुसार तातडीने अतिरिक्त पोलीस मनुष्यबळ उपलब्ध करून देण्याची व्यवस्था करण्यात आली आहे.
