बनावट पासपोर्टवरून सुनावली शिक्षा
चेन्नई : वृत्तसंस्था
चेन्नई येथील विशेष सीबीआय न्यायालयाने अंडरवर्ल्ड डॉन छोटा राजन उर्फ राजेंद्र उर्फ नाना याला बनावट कागदपत्रांचा वापर करून पासपोर्ट मिळवल्याबद्दल ७ वर्षांच्या सक्त कारावासाची शिक्षा सुनावली. न्यायालयाने ५५,००० रुपयांचा दंडही ठोठावला. छोटा राजन फसवणूक, बनावटगिरी, बनावट ओळख वापरून फसवणूक करणे आणि खोट्या कागदपत्रांचा वापर करून पासपोर्ट मिळवणे या आरोपांखाली दोषी आढळला आहे. तो सध्या दिल्लीतील तिहार तुरुंगात आहे, जिथे तो दुस-या एका प्रकरणात जन्मठेपेची शिक्षा भोगत आहे.
सीबीआयने १९ मार्च २००२ रोजी हा गुन्हा दाखल केला होता. तपासात असा आरोप करण्यात आला होता की, छोटा राजनने चेन्नई येथील प्रादेशिक पासपोर्ट कार्यालयाची फसवणूक करून बनावट कागदपत्रांचा वापर करून भारतीय पासपोर्ट मिळवला होता. तपासात असे उघड झाले की, त्याने ‘विजया कदम’ या नावाने पारपत्रासाठी अर्ज केला होता. त्याने शाळा हस्तांतरण प्रमाणपत्र, शिधावाटप कार्ड आणि डिमांड ड्राफ्ट (डीडी) यासह अनेक बनावट कागदपत्रे सादर केली होती.
सीबीआयच्या तपासात असेही उघड झाले की, ‘विजया कदम’ या नावाने पारपत्रासाठी अर्ज करणारी व्यक्ती वास्तविक मुंबईचा रहिवासी सदाशिवचा मुलगा राजेंद्र उर्फ नाना उर्फ छोटा राजन होता. त्याने खोटी ओळख धारण करून आपले वय आणि पत्त्याशी संबंधित बनावट कागदपत्रे खरी असल्याचा दावा करत पारपत्र मिळवले होते.
