नवी दिल्ली : वृत्तसंस्था
डोनाल्ड ट्रम्प यांनी अमेरिकेच्या अध्यक्षपदाची सूत्रे हाती घेतल्यापासून अमेरिकेत अनेक क्षेत्रात उलथापालथ होत आहे. अध्यक्षपदी येताच ट्रम्प यांनी अमेरिकन एजन्सी फॉर इंटरनॅशनल डेव्हलपमेंटला (वरअकऊ) वेसण घातली आहे. ‘यूएसएआयडी’कडून उद्योगपती जॉर्ज सोरोसच्या संघटनांना २६ कोटी डॉलर मिळाल्याचा आरोप ट्रम्प यांनी आधी केला होता. सोरोसने या पैशांचा वापर भारत आणि बांगलादेशसह अनेक देशांत अस्थिरता निर्माण करण्यासाठी आणि राजकीय क्षेत्रात ढवळाढवळ करण्यासाठी केला, असा दावाही ट्रम्प यांनी केला होता. आता संसदेच्या अर्थसंकल्पीय अधिवेशनामध्ये भाजपा खासदार निशिकांत दुबे यांनी हा मुद्दा उपस्थित केला.
भाजपा खासदार निशिकांत दुबे यांनी अमेरिकन संस्था ‘यूएसएआयडी’कडून भारताचे तुकडे करण्यासाठी विविध संस्थाना निधी दिला गेल्याचा दावा केला. तसेच या प्रकरणी चौकशी करून दोषी आढळणा-या लोकांना तुरुंगात टाकावे, अशी मागणी दुबे यांनी सरकारकडे केली. यावेळी काँग्रेसचे अमेरिकन उद्योगपती जॉर्ज सोरोस याच्याशी संबंध असल्याच्या आरोपांचा निशिकांत दुबे यांनी पुनरुच्चार केला.
शून्य प्रहरामध्ये हा मुद्दा उपस्थित करताना भाजपा खासदार निशिकांत दुबे यांनी सांगितले की, अमेरिकेचे नवे राष्ट्राध्यक्ष डोनाल्ड ट्रम्प यांनी ‘यूएसएआयडी’ संस्थेला पूर्णपणे बंद केलं आहे. ही संस्था अनेक वर्षांपासून विविध सरकारे पाडण्यासाठी आर्थिक ताकद लावत होती. निशिकांत दुबे पुढे म्हणाले की, ‘यूएसएआयडी’ने जॉर्ज सोरोसच्या ओपन सोसायटी फाऊंडेशनला भारताचे तुकडे पाडण्यासाठी पाच हजार कोटी रुपये दिले होते की नाही. त्याने राजीव गांधी फाऊंडेशनला पैसे दिले होते की नाही, हे आता विरोधी पक्षांनी सांगावे.
