लातूर : प्रतिनिधी
लातूर वृक्ष चळवळीने लातूर शहरात ५ जून ते १५ जुलै २०१६ ला सुमारे १० हजार झाडे लावली. केवळ लावलीच नाही तर ती जगवली. आता ती झाडे मोठी दहा वर्षाची झाली आहेत. या झाडांचा दहावा वाढदिवस ५ जून रोजी लातूर शहरातील येथील स्टीम एजयुकेशन, पाटील प्लाझा जवळ, औसा रोड लातूर येथे सकाळी साजरा करण्यात येणार आहे. या आगळ्या वेगळ्या कार्यक्रमाला लातूर मनपाच्या आयुक्त मानसी मीना उपस्थित राहणार आहेत. शिवाय शहरात विविध उपक्रमाचे आयोजन करण्यात आले आहे. अशी माहिती लातूर वृक्ष चळवळ आणि सह्याद्री देवराईचे समन्वयक, पर्यावरण प्रेमी सुपर्ण जगताप यांनी दिली आहे.
झाडांच्या वाढदिवसानिमित्त शहरातून वृक्षदिंडी काढून लहान मुलांकडून जनजागृती करण्यात येणार आहे. त्यानंतर प्रतिनिधिक वृक्षारोपण करून काही झाडं लावली जाणार असून वृक्षारोपणाला प्रारंभ होणार आहे. त्यानंतर प्लास्टिक संकलन केले जाणार आहे. तरुण मुलं-मुली बेटावर जाऊन प्लास्टिक उचलणार आहेत. दुर्मिळ वनस्पती व बीज संकलन करणार आहेत. सह्याद्री देवराईला भेट व वृक्षारोपण.केले जाणार आहे. मनपा आयुक्त या सर्व कार्यक्रमाना उपस्थित राहणार आहेत. लातूर वृक्ष चळवळ, सह्याद्री देवराई, स्टीम एज्युकेशन, ऋत फाउंडेशन, स्रेहसृजन फाउंडेशन, सनराईज सामाजिक संस्था, लातूर कॉलेज ऑफ फार्मसी या सर्व संस्था पर्यावरण उपक्रमात सहभागी होणार आहेत. लातूर वक्ष चळवळ ज्याने शहराचा चेहरा मोहरा बदलला आहे. अशी माहिती सह्याद्री देवराई व लातूर वृक्ष चळवळीचे समन्वयक सुपर्ण जगताप यांनी दिली. पर्यावरण प्रेमी नागरिकांनी, विद्यार्थ्यांनी, महिलांनी जास्तीत जास्त संख्येत विविध उपक्रमात सहभाग घ्यावा. असे आवाहनही त्यांनी केले आहे.
लातूर वृक्ष चळवळ गेल्या १५ वर्षांपासून पर्यावरण क्षेत्रात काम करत आहे. लातूर जिल्ह्यात ६ सह्याद्री देवराया उभ्या केल्या आहेत. चाकूर तालुक्यातील रामवाडी झरी, नागराळ उदगीर येथे मांजरा देवराई, बोकनगाव लातूर तालुक्यातील देवीच्या डोंगरावरील देवराई, चिलवंतवाडी औराद शहाजनी जवळ आणि सहावी हासेगाव औसा तालुक्यातील देवराई प्रकल्प उभारले
आहेत.
