न्यू यॉर्क : वृत्तसंस्था
जगातील सर्वात श्रीमंत व्यक्ती आणि टेस्लाचे सीईओ एलन मस्क यांनी आणखी एक विक्रम स्थापित केला आहे. टेस्लाच्या भागधारकांनी मस्क यांच्यासाठी विक्रमी १ ट्रिलियन डॉलर (सुमारे ८८ लाख कोटी रुपये किंवा त्याहून अधिक) पगार पॅकेजला मंजुरी दिली आहे. या पॅकेजमधील एक दिवसाची रक्कम सुमारे २४ हजार कोटी रुपये ($२४०,०००,०००,०००) इतकी होते, जे कोणत्याही कॉर्पोरेट लीडरला दिले गेलेले आतापर्यंतचे सर्वात मोठे पेमेंट आहे.
कंपनीने आपल्या वार्षिक बैठकीत सांगितले की, मतदान करणा-या ७५% हून अधिक भागधारकांनी या अभूतपूर्व वेतन योजनेच्या बाजूने मतदान केले. यापूर्वी, जर त्यांना हे पॅकेज मिळाले नाही, तर आपण कंपनी सोडून देऊ, अशी धमकी मस्क यांनी दिली होती.
मस्क यांना हा मोठा पगार पॅकेज इतक्या सहजासहजी मिळणार नाही. त्यासाठी त्यांना पुढील दशकात कामगिरीचे अनेक मोठे लक्ष्य पूर्ण करावे लागतील. यामध्ये १० वर्षांत २ कोटी (२० दशलक्ष) गाड्यांची डिलिव्हरी करणे समाविष्ट आहे. ही संख्या मागील १२ वर्षांत टेस्लाने तयार केलेल्या गाड्यांच्या संख्येच्या दुप्पटहून अधिक आहे. याव्यतिरिक्त, त्यांना कंपनीचे बाजार मूल्य आणि ऑपरेटिंग नफा वाढवावा लागेल. तसेच, १० लाख (१ दशलक्ष) रोबोट्सच्या डिलिव्हरीवर लक्ष ठेवावे लागेल उल्लेखनिय म्हणजे टेस्लाने अद्याप कोणताही रोबोट वितरित केलेला नाही.
