मुंबई : प्रतिनिधी
महागाईने त्रस्त असलेल्या सर्वसामान्यांच्या घरगुती बजेटवर आणखी एक भार पडला आहे. महाराष्ट्रात आज, ११ ऑगस्ट २०२६ पासून गायीच्या आणि म्हशीच्या दुधाच्या दरात प्रतिलिटर २ रुपयांनी वाढ झाली आहे.
दुधाच्या दरवाढीचा परिणाम केवळ पिशवीतील दूध खरेदीवर होणार नसून दही, ताक, लोणी, पनीर, चीज, तूप, फ्लेवर्ड मिल्क आणि दुधापासून तयार होणा-या मिठाईच्या किमतींवरही होण्याची शक्यता आहे. या दुग्धजन्य पदार्थांच्या दरात सुमारे १० टक्क्यांपर्यंत वाढ होण्याची शक्यता व्यक्त करण्यात आली आहे.
नव्या दरांनुसार गायीच्या दुधासाठी आता ग्राहकांना प्रतिलिटर ६२ रुपये मोजावे लागतील. यापूर्वी हा दर ६० रुपये होता. त्याचप्रमाणे म्हशीच्या दुधाचा दर ७६ रुपयांवरून ७८ रुपये प्रतिलिटर करण्यात आला आहे. ही दरवाढ ११ ऑगस्टपासून राज्यभर लागू करण्यात आली आहे. त्यामुळे दररोज दूध खरेदी करणा-या कुटुंबांच्या मासिक खर्चात थोडीशी वाढ होणार आहे. विशेषत: मोठ्या कुटुंबांमध्ये किंवा दररोज अधिक दूध वापरणा-या घरांमध्ये याचा परिणाम अधिक जाणवू शकतो.
दूध उत्पादक आणि प्रक्रिया उद्योगाच्या संघटनेनुसार, दूध उत्पादनापासून ते ग्राहकांपर्यंत पोहोचवण्यापर्यंतचा खर्च सातत्याने वाढत आहे. पशुखाद्य, जनावरांची देखभाल, दूध संकलन, प्रक्रिया, पॅकेजिंग आणि वाहतूक या सर्वच टप्प्यांवरील खर्च वाढल्यामुळे दूध उत्पादक आणि डेअरी उद्योगावर आर्थिक दबाव निर्माण झाला आहे.
विशेषत: वाहतूक खर्च वाढल्याने दूध वितरण व्यवस्थेचा खर्च वाढला आहे. डिझेलच्या किमतीतील वाढीचाही त्यावर परिणाम झाल्याचे संघटनेकडून सांगण्यात आले आहे. त्याचबरोबर दुधाच्या पॅकेजिंगसाठी लागणा-या साहित्याच्या किमतीतही मोठी वाढ झाली आहे.
दूध उत्पादकांना योग्य मोबदला मिळावा आणि दूध प्रक्रिया उद्योगाचा वाढता खर्च भरून काढता यावा, यासाठी दरवाढ करणे आवश्यक असल्याची भूमिका संघटनेने घेतली आहे.
दही, तूप, पनीरही महागणार
दुधाच्या मूळ दरात वाढ झाल्यानंतर त्यापासून तयार होणा-या पदार्थांच्या किमतींवरही त्याचा परिणाम होणार आहे. त्यामुळे येत्या काही दिवसांत दही, ताक, लोणी, पनीर, चीज, तूप, फ्लेवर्ड मिल्क आणि दुधाच्या मिठाईच्या किमती वाढण्याची शक्यता आहे. या पदार्थांच्या दरात सुमारे १० टक्क्यांपर्यंत वाढ होऊ शकते. त्यामुळे श्रावण आणि त्यानंतर येणा-या सण-उत्सवांच्या काळात ग्राहकांच्या खिशावर अतिरिक्त भार पडण्याची शक्यता आहे. दूध आणि दुग्धजन्य पदार्थ हे भारतीय कुटुंबांच्या दैनंदिन आहाराचा महत्त्वाचा भाग असल्याने या दरवाढीचा परिणाम थेट घरगुती अर्थसंकल्पावर होणार आहे.
यापूर्वीही दुधाच्या दरात वाढ
महाराष्ट्रात याआधीही दुधाच्या दरात वाढ झाली आहे. २०२६ च्या सुरुवातीला गोकुळ डेअरीने म्हशीच्या दुधाचा दर ७४ रुपयांवरून ७६ रुपये प्रतिलिटर केला होता. त्यानंतर मार्चमध्ये पुण्यातील किरकोळ दूध विक्रेत्यांनीही दरवाढ केली होती. आता पुन्हा ११ ऑगस्टपासून प्रतिलिटर २ रुपयांची वाढ लागू झाल्याने ग्राहकांना दुधासाठी अधिक पैसे मोजावे लागणार आहेत.
