लातूर : प्रतिनिधी
दिपावलीचा सण अवघ्या दोन दिवसांवर येवून ठेपला आहे. यावर्षी अत्यल्प पावसामुळे त्याचा परिणाम फटाके बाजारावर दिसून येत आहे. लातूर शहराच्या फटाके बाजारपेठेत फटाके खरेदीसाठी ग्राहकांची रेलचेल म्हणावी तशी दिसून येत नाही. दिपावलीच्या सणात गोडधोड बरोबरच लहान, थोरांना फटाक्यांचेही आकर्षण आहे. बाजारात झाड, हेलीकॅप्टर, लसून, बिडीबाँम बरोबरच फॅन्सी फटाकेही सर्वाचे लक्ष वेधून घेत आहेत.
प्रतिवर्षाप्रमाणे याही वर्षी शहरातील श्री मारवाडी राजस्थान विद्यालयाच्या पाठीमागील मैदानात फटाके बाजार भरला आहे. या बाजारात मोठ्या प्रमाणात फटाक्यांचे स्टॉल्स लावण्यात आले आहेत. यावर्षी एल निनोमुळे जिल्हयात सरारीच्या ५१ टक्के इतका पाऊस झाल्याने जिल्हयात दुष्काळी परिस्थीती आहे. खरीप हंगामातील पिक शेतक-यांच्या हातात आले नसल्याने बाजाराची चेन विस्कळीत झाली आहे. याचा परिणाम फटाके बाजाराच्या बरोबरच इतर खरेदीवर दिसून येत आहे.
यावर्षी फटाके बाजारात ग्राहकांना आकर्षीत लसून, विविध प्रकारच्या फूलझाडी, अ‍ॅटम बॉम, बिडीबॉम, फॅन्सी फुलबाज्या, सुतळी बँब, भुईचक्र सध्या सर्वाचे अकर्षण ठरत आहेत.लातूरच्या फटाके बाजारात शिवकाशी (तामिळनाडू) येथील प्रसिध्द फटाके ग्राहकांच्या पसंतीस पडतील असे विक्रीसाठी आले आहेत.
यात लक्ष्मी तोटे ३०० ते १००० रूपयांना बॉक्स, सुतळी बाँब ५० ते १ हजार रूपये पॅकेट, कुग फूट बाँम १ हजार रूपये पॅकेट, एके ४७ बाँब ५०० रूपये, रेघाळी फटाके २० ते २०० रूपये पुडा, फुलबाजी २० ते २५ प्रकारच्या २० ते ५०० रूपये पॅकेट, भूईनळा १० ते १ हजार रूपये पॅकेट, भुईचक्र १५० ते ५०० रूपये पॅकेट, लसून बॉक्स ३०० रूपये, मोठे तोटे ३०० ते १००० रूपये, १ हजार फटाकडयांची लढ २०० ते ४०० रूपये, हेलीकॅप्टर १०० ते ४०० रूपये, बिडीबॉम १० ते ३० रूपये, बरोबरच टिकली रोल २० ते ३० रूपये, बंदूक, बाजार पेठेत विक्रीस आल्या आहेत.
