वॉशिंग्टन : वृत्तसंस्था
अमेरिकेतील जॉब मार्केटमध्ये अॅमेझॉन या टेक जायंट कंपनीने गेल्या दशकभरात जेवढे योगदान दिले आहे त्याच्या जवळपासही कोणी नाही. मात्र आता लाखो हातांना काम देणा-या या अॅमेझॉन कंपनीच्या अंतर्गत धोरणात्मक कागदपत्र आणि मुलाखतींमधून एक धक्कादायक माहिती समोर आली आहे. त्यानुसार अॅमेझॉन कंपनीने ऑटोमेशनवर भर दिला असून तब्बल कंपनीतील ५ लाखापेक्षा जास्त जॉब्स हे रोबोट्स रिप्लेस करतील.
अॅमेझॉनची अमेरिकेतील वर्कफोर्स ही २०१८ पासून तिप्पट झाली आहे. त्यांच्याकडे सध्या अमेरिकेत जवळपास १२ लाख लोकं काम करतात. कंपनीच्या वरिष्ठ अधिका-यांनी संचालकीय मंडळाला गेल्या वर्षी कागदपत्र सादर केली होती. यात नवीन नोकरभरती करण्याऐवजी ऑटोमेशनवर (स्वयंचलन) भर देण्याबाबत सुतोवाच करण्यात आले होते. यामुळे साधारण प्रत्येक डिलिव्हरीमागे किमान ३० सेंट्सपेक्षा जास्त पैशांची बचत होणार आहे. एवढंच नाही तर ते २०३३ पर्यंत आतापेक्षा जवळपास दुप्पट प्रॉडक्ट्सची विक्री करू शकतात.
अॅमेझॉनने मानवी कर्मचारी कमी करून रोबोट्सद्वारे काम करून घेण्याचा धोरणात्मक निर्णय घेतला आहे. यात उत्पादनही दुप्पट होईल. यासाठी २०३३ पर्यंत कंपनीला जी ६ लाख कामगारांची आवश्यकता होती ती राहणार नाही. म्हणजेच या ६ लाख कामगारांचं काम रोबोट्स करतील. कंपनीच्या वेअरहाऊसमधील (गोदाम) ७५ टक्के कामांचं ऑटोमेशन करून कमीत कमी मनुष्यबळ नेमायचे, असे संकेत कंपनीच्या कागदपत्रांवरून मिळत आहेत.
अॅमेझॉनचं अनुकरण इतर कंपन्याही करणार?
अमेरिकेत वेअरहाऊस आणि डिलिव्हरी या दोन क्षेत्रांमध्ये रोजगाराचे प्रमाण वाढले आहे. हे ब्ल्यू कॉलर जॉब म्हणून ओळखले जातात. अॅमेझॉनच्या ऑटोमेशनचा या दोन क्षेत्रांवर सर्वात मोठा परिणाम होऊ शकतो. अमेरिकेत अॅमेझॉन, वॉलमार्ट या मोठ्या कंपन्या असून अॅमेझॉनच्या निर्णयाचे अनुकरण इतर कंपन्याही करू शकतील आणि शेवटी ‘ब्ल्यू कॉलर जॉब’ करणा-यांवर बेरोजगारीची कु-हाड कोसळणार, अशी भीतीही व्यक्त होत आहे.
