नाशिक : प्रतिनिधी
कुंभमेळ्याच्या सुमारे साडे पाचशे कोटी रूपयांच्या बनावट वर्क ऑर्डरचे प्रकरण ताजे असतानाच आता भरतीच्या नावाने गंडा घालण्याचा प्रकार उघड झाला आहे. सिंहस्थ कुंभमेळा कालावधीत आरोग्य विभागात बंपर भरती असल्याचा बनाव रचून बेरोजगार तरुणांची आणि शासनाची फसवणूक केल्याचा धक्कादायक प्रकार समोर आला आहे. सोशल मीडियावर खोटी जाहिरात प्रसारित केल्याप्रकरणी ‘हेलफोर्स फाऊंडेशन मल्टी सर्व्हिस’ या संस्थेच्या अध्यक्षांसह तिघांवर नाशिकच्या पंचवटी पोलिस ठाण्यात गुन्हा दाखल करण्यात आला आहे.
काही दिवसांपूर्वीच कुंभमेळा प्राधिकरणाचे अध्यक्ष डॉ. प्रवीण गेडाम यांच्या स्वाक्षरीच्या बनावट वर्क ऑर्डरचे प्रकरण नुकतेच उघड झाले. याप्रकरणी नाशिक, मालेगाव येथील पाच जणांवर गुन्हेही दाखल झाले आहेत. त्याचा तपास सुरू असतानाच नव्याने असा प्रकार उघड झाल्याने खळबळ उडाली आहे. त्यानंतर वरिष्ठांच्या सूचनेनुसार डॉ. योगेश चित्ते यांनी या प्रकरणी पंचवटी पोलिस ठाण्यात तक्रार दाखल केली आहे. त्यावरून संस्थेचा अध्यक्ष सचिन शिंदे (रा. देवळा), सचिव निलेश घोलप (रा. कळवण) आणि उपाध्यक्ष विक्रांत सूर्यवंशी (रा. पेठ रोड) या तिघा संशयितांविरोधात फसवणुकीचा गुन्हा नोंदवण्यात आला आहे. पोलिस निरीक्षक (गुन्हे) सुनील पवार करीत आहेत. शासनाची कोणतीही अधिकृत परवानगी नसताना या भरतींची जाहिरात सोशल मीडियावर प्रसारित करून अनेक बेरोजगारांची दिशाभूल केल्याचे त्यातून स्पष्ट झाले.
सदर कार्यालय गेल्या काही महिन्यांपासून या इमारतीत कार्यरत होते, कार्यालयाबाहेर असलेल्या फलकावर आरोग्यविषयक सेवा देण्याचा उल्लेख होता. मात्र ऑनलाइन जाहिरात करताना सिंहस्थाचा लोगो वापरल्याने त्याला भुलून काही नागरिकांनी त्यांच्याशी संपर्क केला का, त्या नागरिकांकडून या तिघांनी पैसे घेतले का, घेतले असतील तर किती जणांची त्यात फसवणूक झाली याबाबत पंचवटी पोलिसांनी तिघांची चौकशी सुरू केली आहे.
कुंभमेळ्याच्या पार्श्वभूमीवर सोशल मीडिया आणि विविध माध्यमांवर नोकरभरतीबाबतच्या अफवा पसरवल्या जात असल्याच्या तक्रारी समोर आल्या आहेत. कुंभमेळ्याच्या नावाखाली कायमस्वरूपी नोकरभरतीचे खोटे आणि फसवे दावे करून नागरिकांची दिशाभूल करणा-या भामट्यांवर थेट गुन्हे दाखल केले जातील. शासनाकडून कायमस्वरूपी भरती केली जात नसून, नागरिकांनी अशा फसव्या जाहिरातींना बळी पडू नये.
सोशल मीडियावर बोगस जाहिरात
सिंहस्थ कालावधीत आरोग्य विभागात भरती होणार असल्याचे भासवत सोशल मीडियावर याप्रकरणी फिरत असलेली जाहिरात आरोग्य विभागातौल अधिका-यांच्या लक्षात आली. त्यानुसार त्यांनी सदर जाहिरात आणि कार्यालयाची खात्री करून त्याबाबत वरिष्ठांना सतर्क केले. संशयितांनी पेठ रोड परिसरात भाड्याने कार्यालय सुरू केले होते. तिथे २०२६-२७ च्या कुंभमेळ्यात आरोग्य विभागात विविध पदांची भरती असल्याचे भासवण्यात आले. मात्र आरोग्य विभागामार्फत सिंहस्थात अशा प्रकारची कोणतीही भरती नसल्याचे सांगण्यात आल्यानंतर हा प्रकार उघड झाला.
