बारामती : प्रतिनिधी
अजित पवार यांचे दुसरे पुत्र पार्थ पवार यांच्यावर कोरेगाव पार्क जमीन घोटाळा प्रकरणावरून होत असलेल्या आरोपांवर अजित पवारांनी प्रतिक्रिया दिली आहे. ते म्हणाले, निवडणुका जवळ आल्या की आमच्यावर असे आरोप सुरू होतात. २००९ मध्ये ७० हजार कोटींचा आरोप झाला. त्यात काहीही निघाले नाही. पण बदनामी आमची होते. बारामतीकर खंबीरपणे माझ्या पाठीशी उभे आहेत असे अजित पवार म्हणाले.
दरम्यान, मुंढवा जमीन व्यवहारात एक रुपयाचा व्यवहार न होता, फक्त आकडे लिहून कशी रजिस्ट्री होऊ शकते, याचे मलाही आश्चर्य वाटले. एफआयआर दाखल झाला आहे. सत्य लवकरच समोर येईल, असे ते म्हणाले.
स्थानिक स्वराज्य संस्थांच्या पार्श्वभूमीवर सर्वच पक्ष तयारीला लागले आहेत. राष्ट्रवादी काँग्रेस अजित पवार गटाकडून देखील जोरदार तयारी सुरू आहे. आज उपमुख्यमंत्री अजित पवार यांनी बारामती येथे पत्रकार परिषद घेत यासंदर्भात माहिती दिली. दरम्यान, अजित पवार यांचे पुत्र जय पवार हे स्थानिक स्वराज्य संस्थांच्या निवडणुकीच्या रिंगणात उतरणार असल्याची चर्चा राजकीय वर्तुळात सुरू होती. या चर्चांवर आज अजित पवारांना प्रश्न विचारण्यात आला यावेळी त्यांनी स्पष्टीकरण दिले आहे.
मी आयुष्यात कधीही चुकीचे काम केले नाही. माझ्या नावाचा वापर करून कोणावरही दबाव आणू नका. चुकीचे काम आजवर केले नाही आणि पुढेही करणार नाही. पवार म्हणाले की, मधल्या काळात काही घटना घडल्या, त्याची चौकशी सुरू आहे. एका महिन्यात वस्तुस्थिती समोर येईल. एक रुपया न भरता कागद कसा तयार झाला हे पाहून मी स्वत:ही आश्चर्यचकित झालो. नेमकं काय झालं हे लवकरच समोर येईल. पण निवडणुका स्जवळ आल्या की आरोपांची मालिका सुरू होते. आधीही आमच्यावर आरोप झाले, पण त्यातून काहीच पुढे आलं नाही. मात्र बदनामी होते.
जय पवार निवडणुकीत उतरणार नाही
जय पवार बारामती नगर परिषदेच्या नगराध्यक्षपदासाठी निवडणूक लढणार आहेत का? अशी चर्चा गेल्या काही दिवसांपासून सुरू आहे असा प्रश्न अजित पवारांना यावेळी विचारण्यात आला. या प्रश्नावर बोलताना अजित पवार म्हणाले, मी पण ती चर्चा ऐकली, मला आज पण बरेच जण म्हणाले परंतु तसे काही होणार नाही. असे म्हणत अजित पवारांनी जय पवार निवडणुकीच्या रिंगणात उतरणार नाहीत असे स्पष्ट केले आहे.
