लातूर जिल्हा मध्यवर्ती सहकारी बँक निवडणूक
लातूर : प्रतिनिधी
लातूर जिल्हा मध्यवर्ती सहकारी बँक संचालक मंडळाच्या निवडणुकीत भाजपा प्रणित महायुतीच्या नेत्यांकडून काँग्रेसच्या नेत्यांवर बेछूट आरोप करण्यात आले होते. त्या आरोपानंतर सहकार मंत्री बाबासाहेब पाटील आणि सहकार पॅनलचे उमेदवार विद्यमान चेअरमन धिरज विलासराव देशमुख यांनी आकडेवारीतून सडेतोड उत्तर दिले. त्यामुळे विरोधी पॅनलची गोची झाली असून, ताळतंत्र गमावलेले विरोधक मुद्दे सोडून बोलायला लागले आहेत. विशेष म्हणजे विरोधी पॅनलचे नेते एकत्र येऊनही पत्रकार परिषदेत देण्यात येणा-या उत्तरांत एकवाक्यता दिसली नाही. यावरून त्यांच्या पायाखालची वाळू घसरत चालल्याचे चित्र पाहायला मिळाल्याचे बोलले जात आहे.
भाजपा महायुतीच्या नेत्यांनी रविवारी तडकाफडकी पत्रकार परिषद घेत आपला राग व्यक्त केला. या पत्रकार परिषदेस माजी मंत्री आमदार संभाजी पाटील निलंगेकर, माजी मंत्री आमदार संजय बनसोडे, आमदार तथा भाजपचे जिल्हाध्यक्ष बसवराज पाटील मुरुमकर, आमदार रमेश कराड, माजी मंत्री विनायकराव पाटील, माजी आमदार बब्रुवान खंदाडे, भाजपाचे प्रदेश प्रवक्ते गणेश हाके, अ‍ॅड. बळवंत जाधव, संतोष सोमवंशी यांची उपस्थिती होती.
या पत्रकार परिषदेत उपस्थित न केलेल्या प्रश्नांचे खुलासे आणि इशारे दिले गेले. विशेष म्हणजे महायुतीच्या सर्वच नेत्यांवर आम्ही महायुती म्हणून या निवडणुकीला सामोरे जात आहोत, हे अगदी निक्षूण सांगण्याची वेळ त्यांच्यावर आली. विनायकराव पाटील यांनी तर सहकार मंत्री बाबासाहेब पाटील यांच्यावर व्यक्त केलेला राग धमकीवजाच होता. उपस्थित न केलेल्या प्रश्नांवर हे नेते काहींही कारण नसताना खुलासे करीत होते. या पत्रकार परिषदेत प्रमुख नेते विरोधी पॅनलवर बोलताना आपापसांतील मतभेद, हेवेदावे लपविण्याचाच केविलवाणा प्रयत्न करीत असल्याचे स्पष्ट जाणवत होते. पत्रकारांनी उपस्थित केलेल्या प्रश्नांच्या भडीमाराला सामोरे जाताना महायुतीच्या नेत्यांची त्रेधातिरपट उडाली. यावेळी उत्तरे देताना त्यांना त्यांचा चिडचिडेपणा लपवता आला नाही, याचीच प्रचिती आली.
पत्रकार परिषदेच्या प्रारंभी आमदार तथा भाजप जिल्हाध्यक्ष बसवराज पाटील मुरुमकर यांनी आजच्या पत्रकार परिषदेचा उद्देश सांगितला आणि निवडणुकीच्या निमित्ताने आम्ही आमच्या पॅनलची भूमिका मांडण्यासाठी पत्रकार परिषद घेत असल्याचे सांगितले. मात्र, संपूर्ण पत्रकार परिषदेत भाजपच्या नेतृत्वाखालील महायुतीच्या पॅनलचे नेते मुद्दे सोडून वैयक्तिक आरोप करताना अधिक दिसले.
